Nan ta e grupo cu ultimo añanan ta sacando potretnan cu mayoria di nos solamente ta mira den revistanan internacional. Imagennan espectacular di universo, di cometanan cu algun ta wak manera un strea cu ta cay.

Space and Nature Aruba Foundation, SNAF no ta consisti di simplemente fanaticonan di fotografia. Presidente Jairo Vrolijk, hunto cu otro miembronan di directiva Jemerio Maduro, Darryl Everon, Aischell Hidalgo, Silveika Maduro-Willemse, Lisandro Arends y Francisco Croes hunto cu mas di 10 boluntario tin un meta specifico.

Nan enfoke ta pa haci educacion riba astronomia y ciencia di planeta tera mucho mas accesibel na comunidad di Aruba y hasta region. SNAF ta afilia na e Universe Awareness, UNAWE, un organisacion cu UNESCO y e International Astronomical Union, IAU, ta sostene, Es mas, UNAWE a keda estableci na 2006 como un programa di astronomia pa educa y inspira hobennan, particularmente esnan cu menos privilegio.

SNAF desde 2019 ta forma parti di e red di IAU di e asina yama National Outreach Coordinators (NOC) pa Aruba. “Nos meta ta pa trece astronomia y geociencia na publico pa medio di educacion, investigacion y evento publico, y tambe mehora e status, comprondemento y e goso di astronomia amateur y ciencia di planeta tera,” ta e mision di e fundacion. Ciencia di planeta tera of geociencia ta cubri tur area di ciencia natural cu ta relata na e planeta, cu ta e constitucion fisico y kimico di planeta tera y su atmosfera.

Saturno y Jupiter

Un di e ultimo actividadnan di SNAF na 2020 tabata pa sigui e asina yama conjuccion entre Jupiter y Saturno. E fenomeno natural aki a permiti hende observa e dos planetanan cu a yega hopi cerca di otro y asina a crea un impresion cu hunto nan lo ta un strea grandi. E ultimo biaha cu por a wak e asina cerca tabata algun cien aña pasa y e siguiente oportunidad ta na 2080. Normalmente, SNAF lo a invita publico pa uni cu nan, pa asina haci uzo di nan telescopnan grandi. Pero pa motibo di e pandemia, no ta permiti di tin aglomeracion. Consecuentemente no por organisa nada pa publico. Pero “basa riba peticion di hopi hende, nos a dicidi pa a haci algo toch. Nos a comparti e observacion di e fenomeno online cu publico.” Consecuentemente a dicidi pa bay ‘live’ cu transmision. E reto mas grandi e dia tabata e tempo cu no a coopera. “Nos no por a haci un programa manera nos tabata kier, pero nos a logra transmiti si.”

Di hobby pa grupo organisa

E grupo a cuminza na 2017, tempo cu Parke Nacional Arikok a organisa un anochi pa observa un eclipse lunar y e entusiastanan aki a topa otro y realisa cu nan tin astronomia den comun. E observacion di strea y galaxia a cuminza como un hobby pa mayoria den SNAF. Nan cuminza como grupo di hende entusiasma cu ta gusta observa cielo y saca potret. El a cuminsa como un hobby. Pero den curso di tempo, conocirnan tabata puntra pa nan tambe por bin wak den e telescop. Mas hende a cuminsa haci pregunta y asina e interes a lanta. E grupo di amigo cu un hobby en comun a dicidi pa organisa su mes, particularmente pasobra tabata invita nan pa duna lectura na scol, y durante campamento vacacional. E miembronan a haya nan mes ta busca mas informacion pa contesta tur e preguntanan cu nan tabata ricibi.

E interes creciente di publico a produci un acercamento entre SNAF y Parke Nacional Aruba, mirando cu tabata organisa e observacionnan den Parke Nacional Arikok. E presentacionnan a sigui evoluciona y miembronan a haya nan mes ta hasta organisa cursonan con pa traha cu telescop. “Y e momento ey nos tur a realisa cu e hobby di nos a bira algo mas serio.”

Astronomo na caminda

E conocemento tecnico di miembronan di SNAF, kendenan ta ingeniero te docente, incluso di fisica, a permiti e fundacion bira mas specialisa y por a produci material di les pa amplia conocemento di publico riba astronomia y e tecnologia rekeri. “Y esey ta nos meta tambe, esta pa educa e pueblo. Di e forma aki nos kier amplia e entusiasmo pa astronomia y finalmente pa naturalesa en general.” Pero tambe internamente ta sigui amplia conocemento. Na e momentonan aki tin un miembro di SNAF cu ta siguiendo diferente curso online. Ya caba el a logra pasa algun module. Y su coleganan di SNAF no ta duna cu denter di algun aña, e fundacion lo por conta cu un miembro cu e titulo di astronomo.

Humildad y pasenshi

Segun SNAF na Bon Dia Aruba, astronomia ta un di e ciencianan cu por gosa di dje sin cu mester sigui un estudio specifico. “Djis e hecho cu por bay sinta un caminda leu, den tur silencio y mayoria biaha den naturalesa, e ta duna un hende e oportunidad pa yega un paz y trankilidad increibel. Y ora hende ta wak ariba, cu un poco mas conocemento, ta realisa cu mundo ta un punta chikito den e inmensidad di universo. E momento ey, cualkier hende por pensa si berdad e problemanan personal ta grandi of no. Cu otro palabra, astronomia y observacion den naturalesa ta relaha, sigur si haci esaki den compania di famia y amigo.”

Loke SNAF a siña ta cuanto hende ta cana rond cu pregunta riba cosmos y esey ta stimula e miembronan pa busca informacion nan mes. E ta un area di specialisacion asina grandi. “Un hende no por sa tur cos, y consecuentemente, e ta siña nos humildad y hopi pasenshi. Pasobra e potretnan bunita cu nos ta publica riba nos pagina di Facebook ta potretnan cu a tuma diferente dia. Un potret di un galaxia ta tuma varios dia pa saca, unda cada biaha mester tuma ocho a 10 ora, y despues edita esakinan pa algun ora riba computer pa por haya e imagennan cu hende por aprecia.

Segun SNAF, den historia di mundo, astronomia tabata semper e unico disciplina cu tabata superpasa guera. Paisnan tabata sigui traha cu otro riba e tereno aki, a pesar di ta enemigo di otro. Consecuentemente, e ta un area di ciencia cu ta crea amistad rond mundo, cu ta fomenta e intercambio di informacion. Pa e fundacion, astronomia pues ta un di e disciplinanan cu por haci mundo, y tambe Aruba un miho luga pa biba.

“Nos lo kier haci cu SNAF por bira un organizacion unda tanto mucha como hende grandi por entretene nan mes y siña algo nobo. Y claro, inspira e siguiente generacion di cientifico, tanto en astronomia y naturalesa. Nos organisacion ta basa riba educacion y habri horizonte pa hobennan por experiencia locual na otro pais, solamente studiantenan di universidadnan cu tin observatorio tin acceso na dje. Pa hopi hoben, nan no ta mira cu Aruba tin hopi di ofrece nan sin cu e ta costa placa y pa e motibo ey mes, SNAF ta promove su actividadnan pa hobennan por acudi sin cu nan mester paga. E eventonan ta gratis y locual si ta pidi ta contribucion di esnan cu por. “Nunca bo sa ki ora ta inspira un hoben di tal forma cu ta cende den dje, un candela pa e educa su mes mas y asina descubri otro opcion di estudio. Pa nos no tin nada mas satisfactorio pa wak e wowonan di mucha of hasta adulto briya cu emocion y tende e grito ‘Wooow.’”

LEAVE A REPLY

Please enter your comment!
Please enter your name here