Recientemente, Centro di Control y Prevencion di Malesa Mericano (CDC) a introduci rekisito pa prueba di test negativo di Covid-19 of prueba cu a recupera, pa tur pasahero yegando Merca via aereo. Esaki a causa preocupacion cerca Evan Brett, un turista Mericano cu a acerca nos pa expresa su opinion.

“Si bo tin plan pa biaha internacionalmente, bo mester haci test no mas prome cu tres dia prome cu biaha via aereo pa Merca y mustra bo resultado negativo na e aerolinea prome cu aborda bo vuelo, of ta prepara pa mustra documentacion di recuperacion (prueba di un test viral positivo recien y un carta di bo proveedor di salud of un oficial di salubridad publico declarando cu bo a ricibi aprobacion pa biaha”, CDC ta informa riba su website.

Esaki ta conta pa tur pasahero yegando Merca for di exterior. E orden aki ta efectivo cuminsando 12:01am EST awe dia 25 di januari 2021.

“Aki noticia hopi lamentabel”, Brett a expresa. “A menos cu gobierno Arubano por duna algun siguransa tocante nan planeamento pa test di Covid prome cu e restriccionnan Mericano, turistanan lo haya nan mes forsa pa cancela nan trip.”

“Tanto Aruba Tourism Authority y Marriott Surf Club continuamente ta provee e tres sitio di test pa turista, djis pa nos haya sa cu no tin fecha disponibel pa februari y maart, incluyendo President’s Day [red: dia 15 di februari]… posiblemente e siman cu mayor demanda entre Pasco di Nacemento y Pasco Grandi. Normalmente nos ta biaha pa Aruba cu alrededor di 12 famia, y di nos grupo, mi famia ta e ultimo wardando. Nos no a cancela ainda, pero lo tuma e decision probablemente e siman aki, ya cu Mericanonan ta cancelando na fabor di e opcion mas safe, Florida”, el a expresa.

Brett su preocupacion principal ta tocante e disponibilidad di laboratorionan pa haci e test necesario. “Mi ta bin ta e-mail personalmente support@aruba.com y management di e Marriott Timeshares, pero ta ricibi cero contesta otro cu referi na e mesun tres sitio. Bo por imagina posiblemente con e lo mustra na momento cu miles di Mericano mester haci test riba e mesun dia? No tin suficiente ora den un dia pa administra y procesa test di covid na un laboratorio.”

Ademas, Brett ta preocupa cu ‘nan ta cobra hasta $125 pa [e test], of $500 pa un famia di 4. Esey ta suficiente pa perde e revenue di turismo’, specialmente mirando otro opcionnan den region. “Na Mexico, hotelnan ta dunando test gratis na e hotel cu un cita garantisa asigna na momento di check-in, pues bo sa exactamente ki dia bo test ta, y no mester bandona e hotel pa haci test. Plan di Aruba pa tur turista descende riba e mesun 3 sitio ya caba sold out no ta realista.”

El a destaca e desconfiansa di e turistanan pa bay hospital. “Spera cu turistanan lo depende riba taxi y bus pa opta pa hospital solamente lo aumenta riesgo di infeccion, y causa mas stress riba e scenario di cuarentena – cual ta un problema completamente diferente na espera.”

“Loke mi ta teme pa Aruba ta turistanan pega y cantidad di turista den rijnan monumental briyando riba rednan social, poniendo Aruba back den noticia. Pa esnan di nos cu ta/tabata planeando di trece nos dollar di turismo na Aruba riba President’s Week, nos ta kedando sin tempo pa sa cu bo tin un plan adecua pa esaki, of e comerciante-, hotel- y restaurant tur ta den riesgo”, Brett a finalisa.

Suficiente capacidad
Bon Dia Aruba a acerca CEO di AHATA, Tisa LaSorte, kende a aclaria cu tin varios sitio unda por haci test. “Pues mi no ta sigur na kico e huesped aki ta referi”, el a destaca. “E manager general di e hotel aki tampoco ta na altura di e keho aki, of cu su huespednan tin problema cu cita. Normalmente un huesped lo acerca management pa un solucion.”

Tocante e varios sitio unda por haci test, LaSorte a aclaria: “Tin test center na diferente hotel, tin e clinicanan, e drive-thru di hospital, y mas. Y e laboratorio/clinicanan priva ta ofrece cita pa haci test na hotel y den camber. Tin varios prijs disponibel entre $75 y $125. Tambe nan ta ofrece test antigen cu ta menos caro.”

Sinembargo, LaSorte ta aclaria cu por tabata haciendo referencia na siman pasa, tempo cu e laboratorionan priva tabata preparando y wardando pa e guianan final di DVG. “E laboratorionan priva (cu ta miembro di AHATA) y e hospital tur ta sigura mi cu tin suficiente capacidad. Si ATA ta sigurando bishitantenan di e hecho aki, mester puntra ATA. Esey ta importante en berdad”, el a finalisa.

Informacion general
Tanto MedCare y Laboratorio di Servicio ta legalmente aproba pa haci test pa antigen y PCR. Nan ta haci esaki na varios hotel.

MedCare Clinica ta specialisa den cuido pa turista, cu sitionan di testing ubica convenientemente na varios hotel. Nan ta habri shete dia pa siman y ta colabora cu Laboratorio di Servicio, cu ta un laboratorio ISO-15189:2012 completamente acredita y ta garantisa resultado confiabel dentro di 24 ora.

Pa test pa salida, MedCare Clinic y Laboratorio di Servicio ta ofrece test Antigen ($50) y PCR ($125).

LEAVE A REPLY

Please enter your comment!
Please enter your name here