Diadomingo ultimo prome minister a duna un update con Aruba ta atendiendo cu e crisis di Covid-19. Dia 13 di maart, Aruba a conoce su prome dos casonan positivo di Covid-19. Ambos tabata casonan cu a bin di Merca.

Mesora a implementa medidanan manera ‘partial lockdown’ pa evita cu turistanan por sigui importa e virus y preveni cu esaki sigui plama. Tambe a tuma decision pa cera scolnan pa evita aglomeracion di muchanan. Y a implementa orarionan di ciere mas estricto. E dianan siguiente a conoce un aumento leve di entre 1 pa 2 caso pa dia.

Mirando cu autoridadnan tabata considera esaki como un aumento hopi abou, y pa evita cu tin mas hende ta cana liber den comunidad cu e virus y sin sa, dia 22 di maart 2020 Gobierno a adapta e strategia di test. A dicidi di adapta e definicion di caso pa Aruba a base di informacion di e prome casonan pa asina aumenta e cantidad di testnan pa dia considerablemente di un averahe di 10 pa dia, pa un averahe di 44 pa dia. E meta di e strategia aki ta pa detecta e virus tempran. Esaki tin como beneficio cu e pashent sa mesora cu e tin e virus y por bay den isolacion mesora pa evita cu e ta pega otro hende. Tambe si e pashent mester di cuido, por dun’e atencion medico mas lihe. Y e deteccion tempran ta yuda Gobierno maneha e crisis miho. E strategia di test mas agresivo y mas hopi ta un di e formulanan pa un pais por maneha e crisis di Covid-19 mas efectivamente. Esaki ta e conseho tambe di WHO.

Respaldo.
Dia 25 maart 2020 a detecta un ‘kluster’ den e centro psikiatrico Respaldo, cu 9 pashent y 9 dunado di cuido, pues 18 Covid-19 pashent den e kluster ey.

Den e dianan 25 te cu 27 maart Aruba a conoce un averahe di 9 caso nobo pa dia.

Medidanan drastico combina cu test.
Despues di e fecha aki y como consecuencia di e strategia mas agresivo di test, e cantidad di test a aumenta na un averahe di 44 pa dia y nos ta detectando un averahe di 2 pa 3 caso positivo pa dia. Tambe a implementa medidanan mas estricto, entre otro toque de queda (19 maart), lockdown completo (26 maart), shelter-in-place (29 maart) y ‘samenscholingsverbod’ (29 maart). Tur esaki pa evita cu hendenan ta sigui tin un motibo pa ta riba caya y transmiti e virus pa otro. Na e momentonan aki, mirando e aumento di averahe 2 pa 3 caso pa dia, no ta mira e necesidad di impone mas medida. Asina por permiti cierto actividad economico continua riba nos pais. Nos ta evalua e situacion pa dicidi si mester escala e medidanan.

Dia 29 maart Aruba a conoce su prome caso di hospitalisacion. Mientras tanto tin 9 pashent den hospital di cual 2 ta den ICU, 1 den MCU y 6 den camber di isolacion. Nan ta stabiel.

Nos tin capacidad den hospital y specialmente ICU ainda. Sinembargo e desaroyo aki ta un motibo di preocupacion. E siguiente pasonan ta pa nos confirma si realmente nos ta hayando tur e casonan cu tin na Aruba, of si nos mester bira mas agresivo den test.

Cu e informacion aki nos por duna un miho proyeccion ki tempo nos ta kere cu e peor a pasa y nos por cuminsa pensa riba reconstrui nos economia y habri fronteranan bek, segun Minister President Evelyn Wever-Croes.

LEAVE A REPLY

Please enter your comment!
Please enter your name here