Studiante na Hulanda: ‘Of bo ta laga hende dicta bo bida of bo ta dicidi di kere den bo mes’

Di wordo conseha pa bay EPB, pa un Master den Tax Law. E studiante Breyli Luna ta comparti cu Bon Dia Aruba su trayecto como un studiante y su plannan pa e futuro di su isla.

Breyli ta conta Bon Dia Aruba cu desde chikito e tabata tin problema pa concentra, pues juffrouwnan di scol nunca a spera mucho di dje. “Mi trayecto a cuminsa na St. Aloysius Basis School. Desde chikito mi tawata un persona hopi hyperactivo, lo cual a causa cu mi tawata distrai masha hopi mes. Den 6de klas, cu 12 aña mi meneer a consehami cu EPB tawata e miho scol pami. E meneer tabata opina cu mi no por a retene informacion pues studia algo practico lo ta miho pa mi. Ignorando su conseho mi a bay Maria College, djey mi a stroom door pa Colegio y na 2012 mi a caba y mi a dicidi di bay Hulanda”, e hoben ta bisa.

 

“Ya esaki tawata di dos biaha caminda mi ta wordo conseha pa no aim too high, but to shoot low.”

 

Manera hopi otro studiante, Breyli a encontra su retonan ora el a bay Hulanda. Hopi di esaki tabata tin di haber cu dominio di e idioma Hulandes. Un biaha mas, e hoben a haya e mesun situacion di Aruba.

“Mi mentor e tempo ey a bisami cu no ta tur hende tin e capacidad pa haci un HBO opleiding, pues e lo consehami pa mi haci un MBO opleiding of pa mi bay mi isla bek. Ya esaki tawata di dos biaha caminda mi ta wordo conseha pa no aim too high, but to shoot low. Na final bo tin dos opcion, sea bo ta laga otro hende su opinion dicta bo bida of bo ta kere den bo mes, den lo cual bo kier y bo ta sigui lucha pa bo soñonan. Den mi caso mi a dicidi pa kere den mi mes, and it has worked out. Aña pasa mi a caba mi grado den ley na Haagse Hogeschool y actualmente mi ta finalisando mi Master den International and European Tax Law na Maastricht University.”

E hoben ta comenta cu Europa ta un continente cu ta ofrece su persona hopi oportunidad pa crece den su carera, pues e lo kier obtene un poco experiencia prome cu regresa Aruba. E no sa si sigui pa su Phd, of cuminsa traha pues e lo tuma tempo pa pensa esaki.

Bon Dia a puntra e hoben Breyli si e ta mira cu Aruba ta duna bon oportunidad na hobennan.
“Pa e hobennan cu ta na Aruba y cu kier bin Hulanda, mi ta considera cu e prestamonan cu Aruba ta facilita pa e studiantenan pa cubri gastonan di estudio na Hulanda, Merca, Canada y otro paisnan un oportunidad unico. Esaki ta algo cu hopi otro paisnan no ta ofrece. E prestamo aki ta facilita pa hopi studiante cu no tin e recurso economico pa paga pa nan educacion den exterior, un oportunidad di por obtene un bon educacion sin importa di ki clase social nan ta bin.

Pa e hobennan cu ta na Hulanda of otro pais y cu kier bin Aruba bek, mi ta considera cu Aruba lo tin mester di crea mas oportunidad pa asina trek e studiantenan ki bek pa Aruba despues di nan estudio. Lo ta bon pa Aruba tuma e iniciativa cu Boneiro a tuma y bin cu un Talent Ontwikkel Programma, pa asina organisa y coordina stages pa studiantenan, di e manera ki Aruba lo haya hopi studiante cu lo bin haci nan afgestudeerstage y cu mas probabel lo dicidi di keda traha na Aruba.”

You May Also Like

Ta pidi aclaracion riba aspecto di radar di Aruba

Ultimo tempo ta poniendo mas atencion riba e problema di ilegalidad drentando nos costanan ...

Reunion entre Elmar y STA no a bay bon pero lo sigui papia

Ayera banda di 10’or di mainta, gerencia di Elmar a reuni cu sindicato STA ...

2Abuso.jpg

FHMDD: “A bira custumber pa keda keto y sconde acto di abuso”

Suzy Kock, Presidente di Fundacion pa Hende Muhe den Dificultad ta splica Bon Dia ...

Hulanda ta subestima posibel fluho di refugiado Venezolano

Tweede Kamer ta sinti cu gobierno di Hulanda ta subestima e situacion unda Reino ...

Meter di awa kibra na Sabana Liber pa basta dia

Diahuebs mainta durante cu oficialnan tabata atende un accidente na Sabana Liber a mira ...

Editorial: Nos ta prepara pa un colapso na Venezuela?

E señalnan t’ey caba! Den e dianan aki nos ta tende bastante comentario tocante ...