Un studiante di 19 aña a muri diamars marduga na Valencia, despues cu el a haya un tiro durante un protesta contra gobierno di presidente Nicolas Maduro, fiscalia a confirma.
Daniel Queliz, a keda herida na su cueyo pa un tiro di arma di candela, ora cu funcionarionan di polis di Valencia a presenta na e lugar, pa asina dispersa un manifestacion cu tabatin dilanti di un conhunto di cas na Valencia (estado Carabobo, centro – norte) asina a sali publica diamars den un comunicado di ministerio publico.
Queliz a ser hiba pa un hospital pero el a “drenta na hospital sin signo di bida” , e texto di comunicado a bisa.
E ciudadano cu a fayece ta identifica como un studiante di Universidad Arturo Michelena, e institucion mas grandi di estudio superior priva di Valencia.
Dialuna, un protesta nobo di oposicion a tuma Caracas y a cay den enfrentamento entre manifestante y funcionario di seguridad pa di cinco biaha den henter luna di april. Otro mobilisacion a tuma lugar na Valencia, Barquisimeto y San Cristobal tambe.
E manifestacion a cuminsa pa motibo di e decision di Tribunal Supremo di Husticia (TSJ) pa tuma funcion di parlamento pa nan mes y laga parlamentarionan sin proteccion hudicial. E sentencia a keda anula parcialmente despues di un fuerte rechaso for di comunidad internacional.
Diamars fiscalia a informa cu lo acusa 40 persona atraves di organismo hudicial, pasobra e personanan ta “supuestamente envolvi den diferente situacion di violencia na Caracas y na estado Miranda (norte) y Lara (oeste). Fiscalia a raporta dos herido na Caracas.
Enfrentamentonan a laga un hoben morto siman cu a pasa den otro protesta y hopi hende herida y persona cu a keda deteni.
Diahuebs pasa a muri Jairo Ortiz, di 19 aña, di un tiro na su pecho, na momento cu polis tabata purba di disolve un blokeo di caminda na Caracas. Diabierna un funcionario di polis nacional a ser acusa pa e caso ey.
E hoben a participa den protesta, gobierno a bisa.
