Den cuadro di finalisacion pa bira maestro di scol, studiantenan di Instituto Pedagogico Arubano (IPA) di ultimo aña, mester haci un investigacion y un proyecto social.
E investigacion ta pa nan tesis di finalisacion di estudio (afstudeerproject), y e proyecto social ta na bienestar di un instancia, grupo of comunidad en general. Di e delaster aki, nan mester haci un presentacion cu ta husga como parti di e examen final
E proyecto social ta hopi importante den cuadro di e desaroyo como docente, pa nan como persona clave den comunidad Arubano cu ta participa y contribui activamente den e desaroyo social y cultural di e pais.
E dia di ayera, Bon Dia Aruba a haci un bishita na e Instituto Pedagogico Arubano (IPA) ora e studiantenan tabata presenta varios proyecto y topico cu nan a elabora y traha riba nan conhuntamente cu e instancianan social na Aruba. Algun di e instancianan aki ta entre otro, The Butterfly Farm, Space and Nature Aruba Foundation, Luna Foundation, AHATA y otro.
Chantalle Giel y Ealeen Ferro a presenta un proyecto tocante e barbulet ‘Monarca’ di Butterfly Farm. Ferro a expresa cu un di nan metanan ta pa nan informacion yega na scolnan di Aruba. Nan a haci diferente les pa e docentenan por ofrece na muchanan di 4 pa 8 aña na scol. Fuera di esey, nan ta promoviendo pa comunidad pa ora nan wak un mata di lechi local, pa cuida nan, pa motibo cu nan ta hopi importante pa e barbulet Monarca pone su webo, y asina conscientisa e hende pa no corta e mata ey.
Gislaine van der Linde y Yuryenne Arends a haci un proyecto cu e fundacion Luna Foundation, cu ta instancia pa conscientisa e comunidad pa yuda bestianan riba caya, tanto cacho como pushi, y asina incentiva e muchanan pa cuida bestia. Nan proyecto ta basa den e creacion di les cu e juffrouwnan por duna den klas, basa riba e cuido di bestia y ki efecto tin ora un bestia no ta bon cuida, y pakico nan ta importante.
Un di e proyectonan cu mas a hala atencion tabata esun dedica pa e fundacion Space and Nature Aruba Foundation, den man di juffrouwnan Lianne Tromp y Gereline Werleman. Nan proyecto tabata consisti di e conocemento riba universo y naturalesa, cu weganan pa muchanan di kleuter scol. Tromp a expresa cu Space and Nature Aruba a bira un fundacion oficial, y poco a poco nan ta dunando informacion pa e muchanan hunto cu telescopio. Nan proyecto ta dirigi na muchanan di 4 pa 8 aña cu materialnan cu ta consisti di lesnan di espacio y e naturalesa di Aruba, hunto cu varios wega por ehempel bingo y un wega di mesa.
[maxgallery id=”39146″]
