Casi un luna despues di eleccion general teni dia 25 di mei na Surinam, presidente Desi Bouterse, e ex-militar cu tabata lider di e golpi di estado na 1980 conoci como “E revolucion di e sargentonan” y cu a presenta na eleccion pa di tres biaha den su carera, ayera dialuna a reconoce su derota.

Nationaal Democratische Partij (NDP) di Bouterse a felicita e partidonan di oposicion pa nan victoria den eleccion y nan decision di avansa cu formacion di un gobierno di coalicion na e pais cu ta ex-colonia Hulandes, mientras NDP ta bay oposicion.

“Nos ta desea prosperidad, sabiduria, forsa y perseverancia den e logro di e meta Surinameño cu ta sagrado pa nos tur: hiba Surinam na un nivel mayor,” NDP a bisa den un comunicado ayera despues cu Conseho Electoral Independiente di Surinam a publica e resultadonan oficial den fin di siman.

E partidonan di oposicion, Partido di Reforma Progresista (VHP), APBO di e ex-lider rebelde Ronnie Brunswijk, Partido Nacional di Surinam (NPS), Pertjajah Luhur (PL) y Hermandad y Unidad den Politica (BEP) a logra 35 di e 51 asiento den Asamblea Nacional, mientras cu NDP di Bouterse a gana e 16 asientonan restante.

Den su declaracion di ayera, NDP a adverti e partidonan di oposicion cu mester “corda” cu nan lo forma un gobierno di coalicion cu no lo ta “un caminda di rosa”.

Ademas, den comunicado NDP ta adverti pa nan lo prepara pa posibel “eventualidad” y a desea pa tur ciudadano cu a vota pa algun partido di oposicion cu lo forma gobierno “e bendicion di Altisimo di cualkier religion cu nan ta profesa”.

Luna pasa Bouterse, cu ta keda hefe di estado te ora eligi un sucesor den parlamento, a bisa cu “e proceso pa eleccion di Presidente y Vice-presidente mester tuma lugar ainda di acuerdo cu nos reglanan”.

 

LEAVE A REPLY

Please enter your comment!
Please enter your name here