Netflix ta mirando un caida den crecemento di su suscritonan hasta prome cu e servicio lider den streaming di video confronta menasanan poderoso di Apple y Walt Disney Co.
E señal mas recien di e retonan cu Netflix ta enfrentando a sali ayera, cu revelacion di su resultadonan di tercer kwartaal. E cifranan a duna mas evidencia cu e dianan di gloria di Netfli por a yega na su fin, particularmente na Merca, unda mayoria di cas cu kier su servicio di transmision, 12 aña bieu, tine caba.
Netflix a agrega 6.8 miyon suscrito mundialmente for di juli te cu september, bou di e pronostico di 7 miyon di Los Gatos, un compania di California. Apenas 520,000 di e suscritonan tabata na Merca, menos di e 800mil cu management a anticipa. E caida a yega despues cu Netflix a perde 123mil suscritonan na Merca den periodo di april-juni, marcando su prome contraccion den ocho aña.
E caida aki y e incertidumbre tocante e futuro crecemento di e compania ta e rason principal cu accionnan di Netflix a cay como 30% abou di su prijs mas halto di $423.21 alcansa 16 luna atras. Accion di Netflix a aumenta 8% den intercambio extendi ayera, aparentemente pasobra algun inversionista tabata anticipando un caida mas grandi den tercer kwartaal.
Netflix a bisa cu ta spera di añadi 7.6 miyon di suscrito mundialmente durante e ultimo tres luna di aña, menos di 8.8 miyon durante e mesun periodo aña pasa.
E pregunta grandi awo ta si algun di e suscritonan actual di Netflix lo dicidi di cancela e servicio y bay pa alternativanan mas barata, cual Apple y Disney lo lansa proximo luna.
