No kier Lago e refineria back. Locual hopi na San Nicolas si kier, ta e stabilidad cu Lago a representa. Esey ta un di e resultadonan yamativo di e investigacion cu Suzette Dumfries a haci na San Nicolas. Manera ta conoci, Dumfries, di profesion Nation Builder cu experiencia na entre otro Dubai, unda el a yuda e famia Real crea un nacion/ciudad cu por ta exitoso los di petroleo, a haci un analisis di e situacion di San Nicolas pa un total di cinco aña largo y awor ta cla pa comparti su recomendacionnan.

Pa compronde e recomendacionnan, Aruba mester reconoce “di con nos desaroyo a bay manera el a bay. E ta cuminza cu e falta di compronde cu Lago no solamente tabata un dunado di trabou, pero tambe e creado di e infrastructura social pa San Nicolas, cu tur su institucionnan.”

E ironia di e investigacion cu Dumfries a haci sinembargo ta cu hendenan no kier un Exxon ni Lago back. Locual kier ta e stabilidad cu e instituto a representa. Con cu bay bin, Lago tabata un compania Mericano cu tabata hiba e sistema Mericano di segregacion. “Nan a bib’e. Na San Nicolas tin un experiencia biba, cu a afecta hende. No ta opinion, sino algo cu nan a biba cu cierto hende mag biba Palisiaweg mientras cu otro por biba unicamente na Village den cas di palo. Esey no ta storia di mi famia, pero si di hopi na San Nicolas. Aruba a permiti esaki pa 60 aña. Ningun autoridad a cuestiona un Colony cu tabata cera pa local. E ta haci algo cu e sentido di balor di hende. Pues hopi hende no kier e aspecto aki di Lago back, pero si nan kier e stabilidad di e sistema. Riba e pregunta si nan kier Lago back, e contesta tabata ‘no’ pero e contesta riba e stabilidad di Lago tabata ‘si,’ pasobra bida tabata regula. For di orario di trabou te na actividad social.”

E investigacion tambe a mustra cu hopi na San Nicolas ta realisa awor si, cu e mesun sistema di Lago a pone cu no a cuestiona e calidad di aire cu e trahadonan y habitantenan tabata exponi na dje cu tur su consecuencianan pa salud. “E palabra ‘cancer’ ta aparece masha hopi mes den e investigacion. Tur respondente tin famia cu a haya cancer.” Locual a impacta e investigado tambe tabata e hecho cu no por come e pisca cu ta biba den e boca banda di refineria, pasobra di e polucion. “Lago a contamina Aruba, particularmente San Nicolas. Pues e contesta si kier Lago tabata cla. E tabata un no. Pero si nan kier stabilidad. Ta hende cu por traha den tur sector, pasobra nan ta trahado duro. Nan kier e habilidadnan cu Lago a genera, incluso pa medio di John F. Kennedy School y no manera EPB y EPI ta haci awor cu mas bien ta prepara hende unicamente pa turismo.”

E solo hecho cu e respondentenan ta consciente di e aspectonan negativo di Lago, y toch ta añora e stabilidad cu e compania a trece ta ilustrativo cu Gobiernonan no a enfoca suficiente pa absorba e necesidad aki y a sigui un desaroyo economico cu no tabata cumpli cu locual realmente tabata kier.

“Aruba a pone su isla disponible pa inversionistanan, pa hotel mas tanto pero tambe un tempo pa Coastal y Valero sin crea e infrastructura pa un economia autonomo,” segun Dumfries. Ora cu Lago a bay, Aruba a keda cu e tereno, y a permiti Coastal y Valero opera sin cu e companianan aki a haya responsabilidad adicional, estilo Lago. “Nan a haya tax holiday, pero por a pidi algo mas a cambio.” E mesun actitud a tuma cu hotelnan, Crucero y aerolinea cu tur di ta afo cu ta haci Aruba totalmente vulnerable di otro.

Falta di consulta

Como Aruba nunca a traha riba su arkitectura economico ta keda discuti riba e autonomia politico. Y no ta consulta pueblo riba decisionnan. Supuestamente tin un democracia representativo, pero den Parlamento tin miembronan cu apenas 80 voto mientras cu otro cu 2000 no a drenta. “Nos ta acepta esey, y nan ta acepta esey, Pero ningun ta mira e necesidad pa un brug entre Parlamento y pueblo. Si bo ta representa mi, bo mester sa kico mi posicion ta. Despues di eleccion, nunca mas ta consulta comunidad di locual ta dicidi pa nos ta alinea cu berdad kico nos kier. Hasta na Hulanda tabatin consulta via internet riba HOFA. Na Hulanda. Ami mes a participa. Na varios pais tin participacion civico. No mester referendum, pero si plataforma di dialogo entre representantenan di pueblo y pueblo. Nos no tin esey.”

HOFA a expone e fayonan

Los di e discusion si HOFA ta bon pa Aruba of no, en todo caso, locual el a expone ta e fayonan grandi den e forma con institutonan ta funciona, segun Dumfries. “No ta consulta nos, ta confundi nos, y na mesun momento, nos ta faya di bisa nos Gobierno cu nos autonomia politico caba ta hancra den Statuut, unda nos mester bay ta autonomia economia.”

Den otro palabra, si no ta cambia di maneho lo sigui gasta sin efectividad y inversionistanan di afo lo no contribui na un sistema pa carga comunidad, manera tabata e caso di Lago. “Lago a mustra nos pa 60 aña con a funcciona den un sistema, cu a beneficia nos. Ta hopi profesional Arubiano a haya beurs di Lago. Como ciudadano corporativo, Lago a contribui na e nacion aki.” Berdad e impacto negativo di Lago tambe tabat’ey, pero e mesun falta di compronde esey, a laga Gobiernonan ignora e aspecto ambiental y contaminacion di refineria y ta awor numa ta contempla con pa cuminza cu limpiesa.

“E les ta cla. Nos mester bay den e direccion di rediseña e arkitectura di nos nacion, kico e papel di e inversionista internacional mester ta.” Suzette Dumfries ta urgi comunidad, y sigur Gobierno pa para keto riba e pregunta ta pa ken ta desaroyando Aruba. “Cu ki meta nos ta desaroyando y ki direccion nos ta bayendo. E claridad ey mester bin entre Gobierno y pueblo y eynan tin un buraco grandi.”