Preocupacion tocante situacion financiero di HOH ta crece Parlamentario Tromp-Lee ta manda pregunta na minister

Situacion financiero di Dr. Horacio E. Oduber Hospital (HOH) a bira tema di preocupacion durante ultimo dianan, despues cu directiva a indica cu fondo disponibel no ta creciendo na mesun ritmo cu e gasto y demanda di cuido.

Parlamentario Shailiny Tromp-Lee (MEP) a manda 19 pregunta pa Minister di Salubridad, Mervin Wyatt-Ras y a solicita reunionnan urgente cu stakeholders. Gobierno, SZA/HOH y UO AZV a acorda pa realisa un analisis financiero independiente pa determina necesidadnan financiero di hospital.

E preocupacion tocante situacion financiero di HOH a aumenta despues cu director Jacco Vroegop a indica na varios medio di comunicacion local cu hospital, ya pa un periodo, ta confronta un diferencia entre e fondo disponibel y e gastonan necesario pa brinda cuido. Segun Vroegop, mientras costo operacional a aumenta considerablemente durante ultimo añanan, compensacion cu hospital ta ricibi via AZV ta aumenta cu aproximadamente 2% pa aña.

Directiva di HOH ta considera cu e aumento aki no ta suficiente pa compensa e aumento den prijs di medicamento, material medico, transporte y otro gastonan operacional. Como ehempel, Vroegop a indica cu costo di cierto handschoen medico a aumenta entre 15% y 16%, mientras algun medicamento a bira hasta 30% mas caro.

Door cu Aruba ta depende pa gran parti di importacion di medicamento y material medico, aumento di prijs internacional y costo di transporte tambe ta pone presion riba gasto di hospital.

Banda di esaki, segun Vroegop, demanda di cuido ta creciendo. E director a relaciona parti di e aumento cu legalisacion di miles di persona durante ultimo añanan. Segun el a indica, aumento den cantidad di persona cu tin acceso na cuido mester bay acompaña pa suficiente recurso financiero pa hospital por absorbe e demanda adicional.

Vroegop a indica cu e presion ya ta ser sinti den operacion di hospital. Segun e, tin servicio cu no por ser brinda na e nivel desea y tempo di espera pa cierto tipo di cuido ta aumentando. Si e diferencia entre recurso disponibel y costo real sigui manera e ta aworaki, esaki por limita capacidad di HOH pa inverti y mantene su capacidad di cuido.

Otro punto cu el a trece dilanti ta gasto relaciona cu cuido brinda na persona indocumenta. Segun Vroegop, HOH tin alrededor di Afl. 28 miyon pendiente pa cuido duna na e grupo aki, un suma cu segun directo ainda no a ser compensa pa gobierno.

Hospital ta sigui brinda cuido na persona cu tin necesidad medico, independientemente di nan situacion migratorio. Sinembargo, el a argumenta cu ora e gastonan aki no ta ser compensa, e carga ta keda riba hospital y por afecta recurso cu por ser uza pa inversion y cuido di e poblacion asegurado.

Den un reaccion riba e preocupacionnan, Organo Ehecutivo di AZV a indica cu Ministerio di Salud Publico, HOH y AZV ta na mesa pa lunas caba pa atende e situacion. AZV a indica cu desde februari 2026 e organismo ta pone recurso adicional na disposicion di hospital.

Segun AZV, desde februari e organo a facilita un total di Afl. 16 miyon na voorschotten, esta adelanto financiero, pa duna HOH mas espacio di likides pa atende su retonan actual. AZV a informa cu actualmente partidonan ta deliberando tocante posibilidad di brinda asistencia adicional mediante mas adelanto, mientras ta warda riba resultado di e estudionan cu ta andando.

E informacion di AZV ta duna mas contexto na e señal di Vroegop cu dialogo cu stakeholders ta andando desde februari. Mientras e director di HOH ta sostene cu e problema di fondo ta financiamento cu no ta suficiente pa cubri e gastonan, AZV ta indica cu durante e periodo aki ya a pone fondo adicional disponibel pa alivia presion di likides.

Sinembargo, e Afl. 16 miyon menciona pa AZV ta adelantonan y no un aumento structural di e compensacion cu hospital ta ricibi. Segun AZV, e estudionan cu ta ser realisa actualmente ta necesario precisamente pa determina un solucion structural y duradero.

E situacion tambe a genera reaccion den Parlamento. Parlamentario di fraccion di MEP Shailiny Tromp-Lee a manda 19 pregunta por escrito na Minister di Salubridad Mervin Wyatt-Ras, solicitando mas informacion tocante situacion financiero y operacional di HOH y e pasonan cu gobierno ta tumando.

E preguntanan ta toca, entre otro, momento cu minister a ser informa oficialmente di e problema, magnitud di e posible deficit, fluho di entrada di hospital y manera cu e necesidadnan financiero ta ser cubri actualmente.

Tromp-Lee tambe ta solicita informacion tocante posible consecuencia pa pashentnan. Entre e temanan menciona tin e situacion di MRI, listanan di espera pa operacion y tratamento specialisa y medidanan cu ta ser tuma pa evita cu problema financiero ta afecta continuidad di cuido.

Un parti importante di e preguntanan ta concentra riba relacion financiero entre HOH y AZV. E parlamentario kier sa si e sistema di financiamento actual, incluyendo e “lump sum” cu hospital ta ricibi, ainda ta refleha costo real di un hospital cu a amplia y modernisa considerablemente durante ultimo añanan.

Den e contexto ey, Tromp-Lee a señala cu superficie di hospital a aumenta di aproximadamente 18 mil pa 35 mil meter cuadra, cu consecuentemente ta implica mas gasto pa awa, coriente, mantencion y operacion.

E parlamentario tambe ta solicita garantia tocante personal di HOH. E ta pidi claridad tocante si e presion financiero por afecta pago di salario, beneficionan secundario of capacidad di hospital pa mantene suficiente personal.

Tromp-Lee, den su funcion como presidente di Comision Fiho di Finanzas, Organisacion Gubernamental, Cultura y Deporte (CFOCS) di Parlamento, a solicita ademas pa convoca reunionnan cu stakeholders relaciona cu hospital. E meta ta pa Parlamento haya un bista mas completo di e situacion directamente di e organisacionnan envolvi.

Dependiendo di informacion cu sali for di e reunionnan, e comision por determina si ta necesario pa invita Minister di Salubridad pa un encuentro adicional of eventualmente convoca un reunion publico den Parlamento.

Gobierno tambe a reacciona riba e preocupacionnan. Den un comunicado gobierno a indica cu e ta consciente di e desaroyonan financiero na HOH y di e preocupacion expresa pa profesional, organisacionnan medico y sindicato.

Segun gobierno, SZA/HOH a presenta su preocupacionnan financiero oficialmente na gobierno na juli 2026. Pa atende e situacion, Pais Aruba, UO AZV y SZA/HOH a acorda pa realisa un analisis financiero independiente.

E analisis independiente acorda entre Pais Aruba, UO AZV y SZA/HOH mester brinda informacion obhetivo y verificabel como base pa evalua necesidadnan financiero di hospital y determina cua decision ta necesario pa garantisa continuidad di cuido.

Gobierno no a indica cuanto tempo e analisis independiente lo dura, ken exactamente lo ehecuta e investigacion ni ki dia resultado por ser spera. Tampoco a anuncia un aumento structural inmediato di financiamento pa hospital.

AZV a confirma cu tambe ta spera resultado di estudionan prome cu yega na un solucion definitivo. Mientras tanto, e organismo ta deliberando si por pone mas adelanto na disposicion di HOH pa aumenta su espacio di likides.

Pa Vroegop, determinacion di costo real ta un paso necesario, pero alabes a enfatisa cu e necesidad financiero ta presente awor. E director a expresa preocupacion cu mientras dialogo ta sigui, hospital mester sigui brinda cuido y absorbe aumento di gasto.

Den e contexto aki Vroegop tambe a apunta riba situacion financiero di AZV, indicando cu mientras e fondo di seguro general ta registra resultado positivo y surplus, hospital ta confronta dificultad pa cubri su necesidadnan. Su posicion ta cu disponibilidad di fondo den sistema di salud mester ser mira den relacion cu costo actual di cuido hospitalario.

AZV y Gobierno ta enfatisa cu continuidad di cuido hospitalario mester keda garantisa mientras e proceso ta andando. Segun AZV, dialogo y colaboracion entre e partidonan mester conduci na un solucion duradero, mientras minister Wyatt-Ras a indica cu Gobierno ta sigui e situacion pa evita cu cuido ta ser perhudica.

Atencion awor ta concentra riba e analisis financiero independiente, cu mester brinda mas claridad tocante situacion real di HOH y sirbi como base pa determina cua medida ta necesario. Ainda tin asunto pendiente, entre otro e Afl. 28 miyon cu hospital ta relaciona cu cuido brinda na persona indocumenta, si e sistema actual di financiamento ta suficiente y con e situacion financiero por afecta inversion, personal y tempo di espera.