Ayera den oranan di atardi, Gobierno di Aruba a ofrece un conferencia di prensa tocante situacion actual di e pandemia COVID-19 na Aruba y ademas SVb a bin dilanti cu un relato pa splica con e fondonan di sostenibilidad ta na e momento aki.

Directo di SVb, Edwin Jacobs a bisa cu e situacion ta premira cu door cu e cantidad di trahadonan a baha caba substancialmente, y ademas e pakete di alivio fiscal cu gobierno ta ofrece, ta nifica cu den e proximo dos of tres luna e cantidad di prima cu nan ta conta cune no ta disponibel mas.

Den comienso di aña, el a comenta cu nan a duna di conoce cu e fondo di pension di biehes ta esun di mas grandi cu nan ta administra y e tabata den recuperacion cu un resultado positivo. Prome cu dia 17 di maart e fondo cu nan tabatin disponibel tabata dispone di 53 miyon florin cash cu por usa. Siman pasa gobierno a duna nan 25 miyon mas, loke ta un suma total di 78 miyon florin.

Di esaki el a señala cu nan gastonan pa luna ta casi di 24 miyon florin. Ademas Jacobs a informa cu den e presupuesto cu gobierno a presenta siman pasa den Parlamento, nan a haya e poder pa un parti di e suma di e prestamo cu lo bay ta destina pa e fondo di e departamento aki.

Den dianan aki, Jacobs a bisa cu nan ta percura pa brinda siguridad social pa trahadonan, conhuntamente cu dunado di trabou y trahadonan. Desde e momento cu gobierno a implementa e ‘shelter in place’, SVb a cuminsa activa nan plan pa acelera e pagonan di beneficio pa su clientenan.

Di esaki, el a informa cu diabierna ultimo a percura pa paga e pension di behes, viudez y orfandad. Ademas, el a precisa cu nan a paga tambe e compensacion permanente pa trahadonan cu tin un incapacidad permanente pa traha.

Di mesun manera, el a laga sa cu prome cu 10 di april nan lo bay paga esunnan cu ta ricibi compensacion di malesa directamente for di SVb pa motibo cu e trahado a wordo retira.

Tambe, Jacobs a comenta cu a prepara e organisacion pa si acaso e shelter in place por prolonga pa mas tempo, pa nan por keda cumpli cu e pagonan aki pa e beneficiarionan.

Comments are closed.