Nos mandatarionan principal a bay Hulanda pa bringa nan caso den e asunto di debe grandi cu nos tin cu Hulanda. Nos a expresa nos sorpresa caba cu na e momento aki caba ta bay atende esey, pero en principio no ta nada malo pa cuminza tempran y no laga cos pa na ultimo, un ehemplo pa nos sigui, en general…

Sin embargo, tin cierto cos cu no ta cuadra. Den un articulo den e edicion aki nos ta trece como noticia, no opinion, cu gobierno a adapta e sumanan na practicamente tur luna di e aña aki, di januari pa september, di principalmente e diferente tiponan di impuesto, luna tras luna; es decir, adaptacion cu supuestamente e luna anterior no tabata disponible. Banco Central tin su informacion di gobierno, y ta simplemente publica. Awor, promer cu nos sigui, laga nos splica cu riba su mes e proceso aki di adapta e cifranan di impuesto di un aña anterior ta masha normal. Den hopi caso un ciudadano, sea un persona natural o legal, ta yega na acuerdo cu Servicio di Impuesto y ta paga awor, pa algo cu ta di un o mas aña anterior, y esey ta aparece como tal. Den e sentido aki, entrada di gobierno ta un asunto fluido, cu ta keda move segun tempo ta pasa.

Pero, tin un cos sigur tambe: e placa a drenta awor y lo ta na banco riba cuenta di gobierno. E por wel di ta pertenece na un aña anterior den sentido administrativo, e placa t’ey awor. Y compara cu loke a drenta te fin di 2021, esaki ta un suma di mas di 900 miyon florin. Esaki nos no a mira nunca ainda. Y leu di critica pa haci bon trabao, nos mester ta contento cu esaki ta posible; esun cu a haci e trabao: elogio.

 

Loke ta keda intriga nos ta cu na mes momento gobierno ta bay Hulanda pa ‘hura nan’ cu nos no lo por paga e debe di mas o menos mes hopi (algo mas di 900 miyon), mientras lo ta logico cu Aruba mester ta contento cu e tipo di ‘meevaller’ aki. Regularmente tanto gobierno como CAft ta papia di ‘meevaller’ cu supuestamente nos tabatin, pero nunca di e tamaño aki.

E preguntanan legitimo cu ta bin awor ta: nos mester usa e placa extra aki pa paga un par di debe cu ta madura otro aña? Esey por haci cu e debenan internacional preferiblemente, pasobra eseynan tin interes mas halto riba nan, y anto lo tin e efecto positivo mas grandi riba presupuesto di gobierno, ya cu e siguiente aña e suma di interes pa paga ta baha mas. O, y esey tambe por ta un opcion, ta paga Hulanda cu esaki y nos ta cla cu nan? Soñar no cuesta nada, pasobra eliminando e debe cu Hulanda, nos tin e otro cinco biyon florin di debe pa paga ainda, na interes halto.

Otro pregunta cu ta surgi ta: dicon awor de repente nos por mira un accion asina mortalmente eficiente den cobranza di varios impuesto, y den tur e añanan anterior tabata lidia cu cumplimento di practicamente tur tipo di impuesto? Lo ta pasobra e Hulandesnan a cuminza ‘yuda nos’ den e hazaña di eficiencia aki? Lo nos tin gana di kere cu ta nos hendenan mes a logra esaki, pasobra esey ta significa cu nos mester bira hopi mas optimista cu cos por drecha riba e isla aki. Y en todo caso esaki por duna nos un vista mas positivo riba nos futuro, pasobra di biaha ta bin e siguiente pregunta: mester di berdad aumenta impuesto, manera BBO/BAZV/BAVP? Pa nos keda na e solo ehemplo aki: BBO/BAVP tabata mustra na september casi doble e suma anota na januari di e aña aki, a bin acerca 167 miyon riba e suma di 181 miyon na januari… Por ta cu awor nos ta comprende cu CAft tabata expresa na varios ocasion cu gobierno tabata demasiado conservador cu nan calculacion di entrada di impuesto, aunke nos no por kere cu nan tabata premira loke a resulta awor.

En todo caso, pa bolbe na e biahe di aparente urgencia pa Hulanda di nos ministronan, nos no ta mira tanto e urgencia pa bisa awor cu ta e debe cu Hulanda ta e piedra di mula mara na nos garganta. E no ta yega mil miyon florin, y nos por paga esaki poco poco, cu interes abao. Manera bisa anteriormente, ta e otro cinco mil miyon di debe ta nos problema principal. Esey ta loke no ta cuadra den e discurso di gobierno; te awe segun nos cinco ta mas cu un. Awor, si por logra cu Hulanda ta pordona nos parti di e debe ey, o completo mes, loke nos no ta mira realistico, esey lo ta un bon logro. Y si logra haya e resto como prestamo cu interes abao, mihor ainda. Sin embargo, pakico lo Hulanda bay suave cu e gobierno aki, si henter e asunto di presupuesto cada vez ta un bochincha grandi, unda finalmente a forza gobierno adapta su presupuesto y acepta cu pa otro aña, y e añanan despues, lo tin un surplus. Ademas, manera expresa anteriormente tambe, no tin avance den termina e cuadro legal necesario pa supervision di Reino. Hulanda debe Aruba un premio pa ‘bon mucha’? Lo ta mihor pa papia awor cu tur dato riba mesa y dicidi loke ta mihor pa e pais… Nan y nos, ta pro transparencia, toch?

LEAVE A REPLY

Please enter your comment!
Please enter your name here