Chauffeurnan di autobus chikito di Aruba a anuncia cu entrante 1 di december 2022 e pasashi lo aumenta cu un florin y lo bira 4 florin. Despues di lunanan di malcontento di parti di e chauffeurnan di autobus chikito pa motibo di aumento di prijs di gasolin y diesel y sin laga afo costo di bida, aumento di prijs di pasashi ta un realidad.
Pa varios luna caba e chauffeurnan di autobus chikito a demostra na diferente ocasion nan malcontento pa e aumento drastico di costo di bida en general, specialmente den e prijs di diesel y gasolin.
Den luna di mei caba reportero di Bon Dia Aruba a acerca diferente chauffeur di autobusnan chikito pa combersa tocante e impacto cu e aumento di prijs di diesel y gasolin tin riba nan trabou di tur dia.
Na e momento ey varios chauffeur a expresa cu nan no por sigui mas den e situacion ey. Nan ta traha, pero lastimamente e placa cu nan ta logra gana durante dia ta bay na diesel, sin lubida cu na esey nan mester agrega cu e situacion en general ta hopi malo.
“Cada biaha cu nos para, y tin masha hopi bus, nos mester warda tur buelta, dos ora pa dos ora y
mey pa haya un buelta. Aworaki nos mester paga e motor pasobra si no bo ta bay pomp stacion y
e placa ta bay tur na diesel y nos no por sobrevivi”, Sonia Vrolijk, chauffeur di bus B-45, a splica.
Otro chauffeur, Beta Croes, e resalta tambe cu e busnan no ta core yen. El a menciona cu tin ora e por sali for di San Nicolas te playa cu dos hende so, dependiendo di e dia. “Mi ta spera cu gobierno por bin cu un solucion of nos tin cu bay para dilanti di Parlamento di Aruba pasobra ta yega un momento cu nos no por mas. Esaki ta nos entrada”, el a agrega.
Den luna di juli e chauffeurnan di autobusnan chikito a uni forsa pa un protesta y a entrega un carta na bestuurskantoor pa asina pidi un aumento temporal den e tarifa di pasashi cu un florin pa motibo cu nan gastonan ta birando demasiado halto.
Segun un chauffeur mes a splica, e aumento di un florin ta pa yuda cubri e gasto di diesel of gasolin solamente, e aumento no ta inclui e gastonan cu e chauffeurnan tin di number di auto, seguro y mantencion di nan busnan.
Despues di varios luna, finalmente e aumento aki ta bira un realidad. Pues e chauffeurnan di e autobusnan a anuncia y a pone notificacion tambe riba papel den nan autobusnan, cu entrante 1 di december di e aña aki. E aumento di tarifa cu un florin lo drenta na vigor.
