Ta demostra cu den temporada di crisis of desaster natural tin aumento di violencia domestico

Durante un conferencia di prensa cu Gobierno di Aruba a ofrece ayera, nan tabatin como invitado Magaly Maduro di Fundacion pa Hende Muhe den Dificultad, ken a splica cu mientras un famia ta experiencia stress, e riesgo ta mas grandi pa nan por haya un escalacion di parti di e abusado, cu hopi biaha tin di haci cu uso alcohol of otro substancianan.

Madura a expresa cu tin victimanan di violencia domestico cu na e momentonan aki di COVID-19 ta na cas y ta core un riesgo grandi. Tambe el a menciona cu casonan di violencia domestico no ta aumentando na Aruba so, ‘e fenomeno horibel aki ta resalta rond di mundo’, el a sigura.

Sobreviviente di abuso familiar ta conoci cu e reglanan di isolacion social, pa motibo cu nan ta custuma cu nan pareha ta kita e contacto cu nan tin cu otro personanan pafo di cas, pero aworaki e abusado tin mas chens di haci esaki..

Na e momentonan aki, e escenario ta perfecto pa individuo por isola y maltrata su pareha. E ceramento ta trece cune hopi stress y e miedo di desempleo hunto cu e enfermedad y un posibel morto ta intensifica e abuso cu nan ta enfrenta. Isolacion ta forsa victimanan di violencia domestico y nan yiunan den circunstancianan peligroso y penoso ora nan ta cera hunto cu nan abusado.

Tambe ta existi cu hobi biaha no ta mira recurso pa e abuso fisico como mental. Ta existi factornan na e momentonan aki como por ehemplo, si a wordo kita for di trabou y cu no por papia cu otro hende of bishita algun amigo.

Desde luna di maart, Maduro a señala cu Fundacion pa Hende Muhe den Dificultad a cuminsa tuma medidanan pa cu e situacion di COVID-19, tanto pa nan personal como pa nan clientenan y su siguridad. Nan a cuminsa traha for di cas, nan a keda den contacto cu nan clientenan nobo, como tambe esunnan cu ya ta conoci caba.

El duna di conoce cu nan tin un number di telefon cu ta 567-167,0 na unda e persona por manda un mensahe of WhatsApp na momento cu e sinti su mes cu ta victima di violencia domestico y di biaha e fundacion lo atende cune.

“E pandemia aki ta forsa nos pa reinventa nos comunidad y con nos ta funciona” Maduro a finalisa.