Durante un charter event cu Toast Master Club, organisacion encarga di crea lidernan, a celebra diahuebs pasa, a nace un club nobo cu e participacion di miembronan di partido Raiz manera Ursell Arends y Tai-Foo Lee, cu e nomber di ‘Orua’ cual ta un club priva y e miembresia mester ta aproba prome pa un persona por bira miembro.

Ursell Arends di partido Raiz a splica cu e intencion di e club ta pa desaroya mas lidernan pa comunidad den tur area y hunto cu e club Toast Masters, nan ta bay desaroya nan mes. Tocante esaki Arends a expresa cu Raiz ya caba a organisa dos simposio den cual e organisacion tabata presente pa asina por haci esey posibel.

Di mesun manera, Arends a manifesta cu den futuro nan lo organisa mas simposio di e partido, pa asina nan por haci mesun cos cu e miembronan di e club, cu kisas no ta politico, pero si lo por para riba un tarima y lidera un simposio di Raiz den futuro.

Tambe Arends a duna di conoce cu nan ta preparando pa e proximo eleccion y nan lo kier desaroya y ta cla. Fuera di esey, fin di luna tambe nan ta cuminsa cu ‘Academia di Politico’, cu ta un curso cu ta encera con gobierno ta funciona, tarea di un parlamento, entre otro, pa asina e miembronan lo ta prepara pa ora nan drenta parlamento of gobierno, nan sa cua ta e tareanan y kico nan mester haci.

Arends a informa cu mientras tanto, nan ta keda crece y sigui prepara pa nan mes. “E comunidad lo bay scucha mas di nos pa e cambionan y reforma cu pueblo ta exigi di un gobierno”, el a sigura.

Tocante e medidanan economico cu gobierno ta implementa, Arends a señala cu si comunidad ta mira bon, tur gremio, NGO, asociacionnan y comerciantenan ta pidiendo pa wordo scucha y e ta haya cu esey no ta tumando luga y e ta espera cu gobierno duna pa nan oido. “Nos no mester lubida cu gremionan, comerciantenan y NGOS ya caba tin inventario di nan retonan y nan tambe tin e solucion proponi; y si gobierno y parlamento scucha nan, mi ta sigur cu nan lo por yega na un entendimento”, Arends a comenta.

Gobierno mester atende loke comunidad y organisacionnan ta bisa, mester ‘ta open’ pa dialoga y asina yega na un solucion. Nan ta sigui impone maneho cu no necesariamente kiermen cu lo beneficia e comunidad, manera el a señala, “gobierno ta un colector di placa y ta e sector priva esun cu ta produci, p’esey nan mester colecta loke ta necesario pa sigui inverti den nos comunidad”.

Full rond di mundo, ta biniendo cambionan structural pa loke ta trata gobierno y con nan ta eherce. Di su banda, Arends a bisa cu su partido ta contra e sistema tradicional di hiba politica y nan lo ta keda vocifera nan mes contra esey, “Nos no ta practica politica di textbook, nos ta scucha y haci investigacion, pasobra asina so bo por sa e decisionnan corecto, saludabel y cu beneficio pa pueblo”, Arends a resalta.

Tocante e contribucion pa Aruba di e reciente club di Toast Masters cu nan a crea, Arends a sigura cu esey no ta solamente pa partido, sino tambe nan ta contribui cu lidernan cu ta duna pa comunidad di otro forma,por ehempel, yuda fundacionnan di baseball, organisacionnan cu ta toca e futuro di otro generacion di Aruba, cu por ta hopi mas prepara cu tur loke nan ta siña den club ta pa lidera e proximo generacion.

Di su banda, Tai-Foo Lee a expresa cu indirectamente e preparacion cu nan ta hayando, e ta pensa cu tur hende cu ta drenta den e club aki ta pa diferente motibo, pero e motibo principal ta pa bira lider y tambe pa haya e oportunidad pa crea hermentnan; y principalmente ta pa e persona por comunica efectivamente.

“Pa partido Raiz, nos kier personanan responsabel y esaki ta parti di dje”, Lee a contesta.

Di loke ta trata e situacion cu pais ta atravesa tocante e medidanan, Lee a duna su opinion y el a bisa cu ‘mas cu tur cos mi ta observa y mi ta ripara cu nan ta creando un pueblo hopi demotiva, no ta importa cua medida, loke ta importante ta e sentimento cu ta crece cu no ta pa yuda nos’, Lee a finalisa.

 

 

 

 

LEAVE A REPLY

Please enter your comment!
Please enter your name here