Campeonato HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a continua den gran forma. Diasabra ultimo riba veldnan na Pos Chiquito weganan oficial di campeonato Femenino a ranca sali. Den un tremendo partido entre Tanki Leendert Girls vs Rebels e muchanan di Rubia Ras esta tanki Leendert Girls a sa di seya nan prome victoria. Francheline Danies ta pone e prome victoria riba su nomber cubriendo 4 inning y ricibiendo relevo di Mildred Kock. Shatienne Kock por mira atras riba un bon actuacion pero ta keda cortico.
Tanki Leendert Girls 12 careda, 6 hit, 2 eror. Rebels un ekipo cu hopi atletanan hoben di San Nicolas 6 careda, 4 hit, 5 eror. Miho batiadonan pa Tanki Leendert Girls ta Mildred Kock 4-2, Jelitza Ras 3-2 y Jeritza Ras di 2-1. Pa Rebels a destaca na plato den causa perdi Shadifa Lewis 3-2, Zjaika Kock 3-1 y Dinouska Mauricia di 1-1. Diahuebs awor 1 di Juni y diabierna 2 di Juni pre selecion di Aruba lo enfrenta College USA 630pm na Pos Chiquito. Diabierna 2 di Juni tambe lo tin un tremendo double header den AA unda Royal Power lo enfrenta Balashi Premuim cuminsando pa 715pm na Flatstone. Weekend tambe lo bay tin diferente wega. Pues fanaticada di softball yega tereno bin apoya bo ekipo preferi. Softball den pleno desaroyo
