Un team di Organisacion Mundial di Salud (WHO) ayera a bishita un hospital unda China ta bisa a duna tratamento na e prome pashentnan di Covid-19 mas cu un aña atras, como parti di e fact-finding mission di e expertonan riba e origen di coronavirus.
E miembronan di team di WHO y oficialnan Chines anteriormente tabatin nan prome reunionnan presencial na un hotel prome cu bishitanan den y rond di e ciudad central di Wuhan den proximo dianan.
“Prome reunion cara-a-cara cu nos coleganan. Coreccion: tapaboca-a-tapaboca mirando e restriccionnan medico”, virologo Hulandes, Marion Koopmans a tweet mainta.
El a bisa cu nan tabata discutiendo nan programa di bishita y lider di team Chines, ‘prof. Wannian’ tabata haci chansa tocante algun problema tecnico, un referencia aparente na e top epidemiologo Chines, Liang Wannian, ken ta un lider di team di respuesta di China.
“Bunita pa mira nos coleganan despues di reunionnan largo riba Zoom”, Koopman a tweet. E investigadonan bishitante a tene reunionnan via video durante 14 dia di cuarentena despues di nan yegada na China. Nan a sali di cuarentena diahuebs ultimo.
Miembronan di e team a bandona e hotel riba auto, y tiki despues, a drenta e Hospital Provincial di Hubei di Medicina Integra Chines y Occidental. Segun e cuenta oficial di China di su respuesta na e brote inicial, Dr. Zhang Jixian tabata prome pa reporta casonan di loke e tempo aya tabata conoci como ‘pneumonia di origen desconoci’ na e hospital riba dia 27 di december 2019.
WHO anteriormente a bisa riba Twitter cu e team a solicita ‘data latente detaya’ y tabatin plan pa papia cu e prome respondientenan y algun di e prome pashentnan di Covid-19. Tambe tabatin plan pa bishita mercadonan manera e Huanan Seafood Market, vincula na hopi di e prome casonan, e Instituto di Virologia di Wuhan, y laboratorionan na facilidadnan manera e Centro Wuhan pa Control di Malesa.
E mision di e team a bira politicamente carga, mientras China ta busca pa evita culpa pa supuesto erornan den su respuesta incial na e brote.
“Tur hypotheses ta riba mesa mientras e team ta sigui e ciencia den nan trabao pa compronde e origen di e virus Covid-19”, WHO a tweet.
Confirmacion di e origen di e virus probablemente ta bay dura varios aña. Determina e fuente animal di un brote tipicamente ta rekeri un investigacion exhaustivo incluyendo tuma muestranan animal, analisis genetico y estudionan epidemiologico.
Un posibilidad ta cu un cazador di bida salvahe por a pasa e virus na comerciantenan cu a hiba esaki na Wuhan. Gobierno Chines a promove teorianan, cu tiki evidencia, cu e brote por a cuminsa cu importacion di cuminda di lama frozen infecta cu e virus, un nocion rechasa rotundamente pa cientifico- y agencianan internacional.
Un posibel enfoke pa investigadonan ta e instituto di virologia na e ciudad. Un di e top laboratorionan di investigacion di virus na China, a construi un archivo di informacion genetico riba coronavirus di vleermuis despues di e brote na 2003 di Sindroma Respiratorio Agudo Severo, conoci como SARS.
E prome clusternan di Covid-19 a keda detecta na Wuhan pa fin di 2019. China desde e tempo ey a reporta mas di 89mil caso y 4,600 morto, cu casonan nobo principalmente concentra den su nort-oriente frigido, unda ta imponiendo lockdown local y restriccionnan di biahe pa contene e brote.
Casonan nobo di transmision local ta continua baha, cu apenas 36 anuncia diabiera, mientras hopi menos Chines ta parce dispuesto pa biaha pa e Aña Nobo Lunar.
