Sindicatonan no ta kere Gobierno y pa oposicion, Prome Minister mes ta pone Parlamento un banda

No por pone Parlamento un banda ni Constitucion di Aruba. Asina Prome Minister Evelyn Wever Croes a reacciona riba e decision di Gobierno di Reino pa wanta cu e decision pa duna Aruba sosten di likides pa e prome kwartaal di 2022. Un decision cu segun Prome Minister cu no ta husto.

“Nos no a yega na otro, pasobra a pesar cu Aruba ta cumpli cu tur condicion, a recorta salario, a implementa e landspakket al pie de la letra, na ultimo momento Hulanda a bin cu un condicion nobo cu no tabata parti di e palabracion, un condicion cu ta bay contra nos Constitucion, cu nos lo mester bypass Parlamento.”

Ta trata aki di e tema di supervision financiero. E protocol di supervision ta termina na fin di luna y segun Evelyn Wever Croes, a negocia e Rijkswet Aruba Financieel Toezicht, Raft cu mester bin na vigor ainda. “Hulanda tin manera duda den e RAft y kier otro protocol pa e periodo transitorio te ora na e ley. Nos a bay de acuerdo cune.” Pero pa Gobierno di Aruba, e protocol mester ta pa un aña pasobra pa e ora ey e RAft mester keda cla. “Nan a bisa no, e mester ta un protocol di transicion sin un fecha final, sin einddatum.”

Den concepto di Prome Minister, si cera e protocol di supervision financiero sin un fecha di fin, e ta practicamente un ley y ta nifica cu ta pone Parlamento un banda, y “no ta locual cu a palabra cu otro. A palabra un RAft y no un protocol sin fecha final. Un RAft ta un ley cu mester scucha Parlamento di Aruba di dje. Nos a splica e ambtenaarnan di Ministerio pa Asuntonan Interior y di Reino riba esaki. Nos a manda carta dia 8 di December y lamentablemente nos no a sali afo.”

E lider di Pais Aruba a bisa cu e conclusion di Hulanda tabata cu como cu no a sali afo no por duna e sosten di likides ainda.

“Ademas, nos peticion tabata pa stop e recorte di salario di 12.6 porciento, pa reducie te ora cu yega na cero (0) na 2022. Esey nan no ta de acuerdo cune y Secretario di Estado Raymond Knops a bisa esey tambe den su entrevista. Nan ta pone e recorte di 12.6 como un condicion pa henter 2022. Nos no a bay de acuerdo cu esey.” Segun mr. Wever Croes, Minister Plenipotenciario Guilfred Besaril a protesta e ponencia di Hulanda energicamente y “nos no a yega na acuerdo cu esey tampoco. Ta solamente si nos sigui cu e recorte di 12.6 porciento pa full 2022 y un protocol sin fecha di vencemento, awe nos lo a haya e sosten di likides. Pero nos no a bay de acuerdo cu e dos condicionnan ey, pasobra e no ta husto. No ta pasobra COVID a dal nos, mester sigui abusa y impone cos contra nos constitucion cu nos no kier acepta. Bisando esaki, nos ta sigui na mesa, nos ta sigui e deliberacionnan y mi tin tur fe y confianza cu nos ta bay sali afo prome cu e Rijksministerraad di Januari. Hulanda ta den pleno preparacion pa un Gobierno nobo. Nos ta pendiente pa sa ken ta bay bira nos Minister encarga cu asunto di Reino y mi lo habri e combersacion cune y mi tin fe y confianza cu nos ta bay logra.”

Pero kico esaki kiermen pa Aruba?

Segun Wever Croes, e decision aki ta nifica cu Aruba ta keda sin sosten di likides. “Sinembargo nos a traha riba un plan B caba. E plan B ta pa Gobierno por sigui cubri su gastonan. Nos por paga salario, gasto di cuido, e campaña di booster, siguridad di nos Pais, Enseñansa. Pero nos no tin e fondonan pa cumpli de inmediato cu e exigencia di sindicatonan. Nan a exigi pa stop cu e recorte y e ora por papia.”

Como tal, Prome Minister a bisa cu e kier pa e sindicatonan sinta na mesa cune pa un dialogo. Ya a haci calculacionnan, diferente modelo den e margen permiti pa asina toch yega na un alivio di e recorte di 12.6. “Pero mi ta invita sindicatonan pa nos ta hunto, pa ta un frente uni y pa asina ta mas fuerte. Y na comunidad di Aruba, esaki no mester ta motibo di preocupacion di miedo y panico. Nos tin nos plan B y ningun hende lo ripara algo di e decision tuma awe. Mientrastanto nos lo sigui negocia cu tur fe y confianza.”

Sindicatonan no ta kere Prome Minister

Di nan banda e sindicatonan den protesta, hunto cu e organisacionnan cu a uni na e demanda pa para e recorte di 12.6 porciento a reacciona riba e decision di Gobierno di Reino y tambe e declaracion di Prome Minister.

“Loke ta hala atencion ta e hecho cu e Secretario di Estado Sr. Knops ta bisa cu, uno, Hulanda ta bisa cu Aruba no ta cumpli cu e palabracionnan y condicionnan. Dos, Aruba y Hulanda lo a yega na un acuerdo riba ‘Ambtelijk niveau’ riba COHO dia 2 december 2021 y segun Hulanda cu awor gobierno no kier firma esaki y tres Aruba lo no kier un protocol pa ‘financieel toezicht.’”

Tuma pueblo haci

Den concepto di e sindicatonan y organisacionnan, pa nan e ta cla cu Gobierno di Aruba kier purba di tuma pueblo haci. “Ora sindicatonan ta bisa di no ta kere den nos Gobierno, ta pa e motibonan aki. Tin un falta di transparencia grandi di banda di Gobierno di Aruba y un hungamento cu emocion di e hende. Di otro banda ta impone y menasa trahadornan, esaki tampoco ta yuda.”

E carta ta sigui bisa cu e sindicatonan y organisacionnan ta sinti cu Gobierno “kier convence nos cu ‘nan’ ta traha duro, pero si nos sigui loke ta e contesta di banda di e Secretario di Estado, nos por deduci cu no ta berdad. Loke si a sali na cla awor, tin ‘un famoso protocol’ cu ningun hende tabata na altura di dje. Pueblo sigur cu no. Ta nifica cu gobierno di Aruba kier sigui ‘negocia’ cu salario di trahador. Ta sigui negocia cu e bienestar di pueblo, pa nan sigui yena e aparato publico cu contractantnan cu salario, cu no ta a base di e areglo forma, esta e ‘Bezoldigingsregeling”. Pues cu salario cu ni ambtenaarnan a cobra.”

Sindicatonan ta sigui bisa cu segun Gobierno diripiente Hulanda kier pa ‘bypass’ Parlamento ta bini como exigencia, awor cu gobierno di Aruba no kier pone paro na ‘accionnan contrario’, na loke nan ta acorda tras di cortina cu Hulanda. “Esaki pa mañan nan culpa otronan di e contra reaccionnan di Hulanda. CAft a pidi gobierno di Aruba pa ‘kita’ e 8 miyon cu tin poni riba presupuesto pa tuma mas personal den servicio. Akinan ta sconde cu ta pa yena vacatura pa funcionnan esencial.”

Trocemento di berdad

Den concepto di sindicatonan, esaki ta yama trocemento di e berdad y ta leu di ta berdad.
“Nos semper ta habri pa dialogo, semper y cuando cu e informacionnan ta corecto y e cifranan ta certifica. Si Parlamento mes ta reclama di no ta ricibiendo informacion corecto ta kico sindicatonan por spera?

Sindicato y Organisacionnan ta insisti riba e hecho cu ta fuera di tur etica y contra tur moral pa un pais Aruba cu tin democracia den su rol como dunador di trabao, mishi den cartera di su empleadonan, trahador di companianan estatal y trahador di fundacionnan. Tambe keda mishi cu e Gelijkbedrag di pensionadonan. E fraccionnan den coalicion cu tambe ta sigui vota pro pa e tipo di accionnan aki ta complice den e hincamento di man den cartera di trahadornan. Nos no ta acepta e ponencianan, ni e mita berdad di parti di gobierno di Aruba y ta sigui riba e exigencia pa stop e kitamento di e 12.6 porciento.”

Den concepto di e grupo cu a manda e carta pa Gobierno, ta parce cu Gobierno di Aruba no por ni soluciona problema di su empleadonan corda pa bini cu progreso y bienestar pa pais Aruba.

‘Bypass’ Parlamento

Mester bisa cu durante e splicacion di Prome Minister Wever Croes riba e combersacionnan cu Hulanda, lider di oposicion Mike Eman a bisa cu ora cu Gobierno a acepta tur e condicionnan di Hulanda pa sosten di likides, a haya splicacion cu tabata cuestion di sino fono. “Y nos ta sinti cu awor e realidad a yega na nos. Nos a haya financiamento.” Pero contrario cu locual tabata e autoridad di CAft na 2015, e colegio a haya un autoridad mucho mas amplio y “e ta bira imposibel cu Aruba tin su propio gobernacion. Ehempel ta con dunado di trabao, esta Gobierno mester haci un peticion na Hulanda pa por negocia cu e trahadonan publico.” Eman tabata kier sa unda e derecho di Aruba a keda?”

Lider di MAS drs. Marisol Lopez Tromp di su banda a haya sorprendente cu Prome Minister Evelyn Wever Croes diripiente ta pensa riba e papel di Parlamento y ta preocupa cu Hulanda kier ‘bypass’ e organo legislativo. “No tabata e mesun Prome Minister Evelyn Wever Croes kende a ‘bypass’ Parlamento den e acuerdo cu Eagle LNG?” tabata e pregunta di Marisol Lopez Tromp.