Despues di algun siman di turbulencia grandi, e fin di siman cu a pasa a yega un fin na e conflicto entre ministro Oduber y e resto di gabinete Eman. Den e declaracion di tanto Prome Ministro como di ministro Oduber no tabatin absolutamente nada di cual por a deduci kico tabata e problema(nan) trata y na ki solucion o acuerdo a yega. A keda un misterio ta kico tabata realmente e problema cu a hiba hasta na kibramento di mueble den sala di reunion dia 5 di januari ultimo, unda ministro Oduber a dicidi di tuma paso drastico bayendo cerca Gobernador.
Nos por a comprende di palabranan di ministro Oduber, ora el a sali for di oficina di Gobernador, cu el a bay entrega un documento, cu te awe nos ta supone tabata un ‘retiro condicional’ si ta existi algo asina den nos sistema legal. El a trece dilanti tambe cu e tabatin problema cu cierto asunto, di cual en todo caso a menciona maneho di Finanza Publico y di Husticia. Tambe a sali na cla cu e lo tin un problema con ta maneha e permisonan cu mester otorga pa yega na operacion di un hotel, sin cu e como ministro encarga cu turismo tin algo di bisa den esey. Pero e critica fuerte riba su colega di Infrastructura no a bin di su parti, sino di hues den e casonan cu tabatin den corte tocante permiso pa haci cambio di erfpacht. E por a vocifera un critica y exigi un maneho drechi di otorgamento di tereno pa hotel y apartamento, pero den tur e comentarionan cu tabatin, esun di e ministro a briya pa su ausencia…
Manera menciona, despues di e reunion di reconciliacion no a duna detaye di kico a discuti y na ki acuerdo a yega. Como publico, nos aparentemente mester ta contento cu a yega na un paz interno y lo demas mester keda secreto. Asina simpel? Señores, mester recorda boso cu boso tin un funcion publico. Nos como pueblo no a manda ningun hende bay bringa, pero una bes boso mes ta haci esaki publico, nos tin e derecho como pueblo pa sa kico a pasa y kico ta bay ta e solucion. No por ta asina cu awor ministro Oduber ta join su coleganan pa tratamento di presupuesto, manera nada no a pasa, mientras ta e mes a anuncia cu e tin problema cu cierto aspecto di finanzas di gobierno. Cual ta e problemanan cu e tabata mira anto y e pregunta ta si nan a keda atendi den e presupuesto aki, pasobra asina leu cu nos sa, no tabatin ningun cambio den e presupuesto desde su entrega cerca Parlamento dia 15 di december 2015. Por ta cu e problemanan a disparce pasobra pitufo lo a cambia algun cifra den e presupuesto? E pitufonan a corda di haci e cambionan tambe den e copianan cu oposicion a haya?
Si a yega na cierto palabracion pa loke ta e maneho di husticia, lo ta interesante pa sa cual ta e cambionan y ki consecuencia esaki tin pa presupuesto di e ministerio aki, pasobra asina leu cu nos sa, a corta presupuesto di husticia cu mas o menos 3 miyon y asina dificilmente e ministro concerni, cu a guli hopi critica ultimamente, por hiba un maneho mas efectivo. Ta straño cu e ministro aki, cu no ta conoci como un persona cu ta keda keto ora cu ta toca un asunto di su cartera, no a comenta y sigur no a ‘raise hell’ ora cu a corta den su presupuesto. E tambe por a bisa Prome Ministro pa baha man cu tanto coordinador (mas di 100) riba su payroll y uza e placa ey pa hinca den husticia. Lo e por a haya bastante apoyo den pueblo cu esey. Pero e no a haci’e, por algo será…
Y pa bolbe na e asunto cu e ministro di turismo: si e tabatin problema cu e presupuesto 2016, anto e lo mester a laga sa di antemano, prome cu e presupuesto a bay completo pa Parlamento di a 15 di december 2015, cu su firma riba e carta acompañante, e asina yama ‘aanbiedingsbrief’. Cu esey formalmente el a declara di ta di acuerdo cu e presupuesto entrega, ni kico e bisa o skirbi despues. E formalidad di firma o no firma e ‘Verslag’ cu ta e contesta di gobierno riba e preguntanan di Parlamento, no ta asina relevante, a menos cu den e contestanan el a declara di ta den desacuerdo cu algun elemento den e presupuesto, loke asina leu cu nos sa, no ta e caso.
Di tur manera, henter e episodio aki ta caba na un manera cu ta un gran falta di respet pa pueblo en general. Ningun hende a pidi pa haci e conflicto interno aki algo publico. Pero una bes bo a tira esaki riba caya, manera un tormenta mayor, bo no por pretende awor cu e tabata nada mas cu loke na Hulandes ta yama “een storm in een glas water”
