Tradicion di number di auto mester keda?

Ta e tempo di aña ey atrobe. Tur caminda ciudadano papiando di ki dia y ki ora ta miho pa busca number di auto? A pesar di esey mayoria ta sigui bay den oranan di mainta, pa topa cu mas ciudadano cu tambe tin e mesun idea. Mester bisa cu e departamento a haci un esfuerso pa extende e orario cu por pasa pa paga y ricibi plachi, plus facilidad apart pa esnan cu a paga online. Tur esaki ta bon intenciona, pero no ta resolve e problema fundamental y esey ta cu ta asina hopi hende mester acudi na e oficina di Impuesto pa keda cla cu nan pago y nan plachinan.

E critica cu ta keda ta cu tin otro manera pa organisa e cos aki. Pa cuminsa, e experiencia cu nos tabatin di algun aña cu e sticker na lugar di e plachi nobo cada aña tabata asina negativo? Di tur manera tabata visible si un auto tin su impuesto paga, si no e no tin sticker di e color crespondiente. Claro cu e plachi di diferente color ta mas visible, loke aparentemente nos cuerpo policial lo ta encanta cune. Pero pakico anto den otro pais nan no ta sigui nos den nos ‘tradicion’ aki? E pregunta clave aki ta si ta trabao di polis pa controla si bo a paga bo impuesto. E departamento ta mandando cobranza caba pa esnan cu no ta paga na tempo. Ademas, si tin control regular, unda ta para tur auto y ta controla riba tur aspecto, anto tur hende ta bira mas cuidadoso, den tur cos.

Pero kico ta pasando awor? Tur esnan cu tin nan number paga y a demostra cu pa algun tempo, un o dos luna, nan tin nan seguro paga, y despues no ta preocupa mas pa paga nan seguro, ta core rond despreocupa, te ora nan dal auto, causa daño, tin biaha grandi, y ta bin resulta cu nan no tin seguro, pa varios luna caba… Pero den tur e tempo ey nan a pasa ‘bon mucha asina’ banda di control di polis, y luci como ciudadano cumplidor pasobra nan tin plachi di e bon color, mientras nan no ta cumpliendo cu ley. Y kico ta mas grave, realmente: core sin paga impuesto o core sin seguro? Acaso polis tin e olfato pa sa cual auto, cu number corecto, a paga o no a paga su seguro? O cu e mesun olfato infalible ey nan por deduci cual auto tin un keuringskaart valido? No ta miho pa controla auto ‘at random’ incluyendo esnan cu tin nan number paga? Di unda a sali semehante bruhamento di tarea y responsabilidad cu ta haci cu den cierto aspecto si mester cumpli, pero cu otro, mes o mas importante, nos por core gran parti di aña violando ley?

E unico conclusion corecto ta cu mester exigi di gobierno cu ta bin un sistema adecua di control riba seguro di auto, pa nos no haya nos cu e mal sorpresa cu nos ta paga seguro, pero pa mala suerte ta haya un accidente cu un otro persona, cu no a haci esey y si e tin culpa, abo ta sinta cu un auto kibra y bo dilanti un persona cu ta manera e conocido ‘dori, cu bo no por pluma.’ Si ta encarga polis cu e tarea ey, ta bon pero e argumento di polis cu asina ta mas facil pa controla ta parcialmente corecto so.

Y ya cu nos ta contemplando funcionamento di aparato publico, ata otro asunto mal regla, na nos opinion. A regla cu e apreciable ciudadano mester acudi na un MFA pa por haya e comprobante di registro di su auto. Pa por haci esey, despartamento di Impuesto a pone un pantaya na cada MFA, unda riba peticion bo por haya e papel aki, cu ta indispensable pa bo por laga keur bo vehiculo. Masha bunita toch, esta bon regla… of no? Honestamente, nos ta kere cu no. Gobernacion bon ta tocante haci cos lo mas simple posible. Den e caso aki, na lugar di manda tur ciudadano bay na un MFA pa busca un papelito, cu ta totalmente innecesario, pasobra si a pone e mesun pantaya na oficina di DTI na Barcadera, nan por controla al instante si e datonan di e auto cu ta bin keur, ta cuadra cu e database di departamento di Impuesto.

Den caso cu tin disparidad ta bisa e cliente pa e bay regla esaki prome na departamento di Impuesto, anto despues ta atende e auto. Aparentemente ningun hende a puntra nan mes pakico 30.000 o mas hende cada aña ta bay inutilmente na un MFA, pa un papelito inutil cu den e era moderno aki por a regla facilmente di otro manera. Ta parce, mientras cu cada biaha nos ta tende un monton di promesa yen di palabra bunita di ‘innovacion’ y ‘digitalisacion’ anto pa nos mester ripara cu aparentemente gobernacion ta den man di hende cu ni sikiera ta comprende kico nan por y mester haci cu instrumento moderno, cu ademas a costa un monton di placa… di nos. Pero ya, kico haci: nos mester mantene nos tradicion. E plachi di number ta un di nan.

You May Also Like

Kita prome, despues pone atrobe; Entre decision mal tuma y incertidumbre

Remarcable tabata den e dianan aki e decision di gobierno pa revoca e medida ...

Invacion hudicial a cambia panorama politico

Siman pasa gobernacion tabata manera un cas di galiña unda un boa a cay ...

Defensa di maneho gubernamental ta esencial

Debate debilita cu ausencia di AVP E noticia di ultimo ora cu e partido ...

Ministro cu medida na DIP/DOW

Y ta revela detaye di e practica coruptivo For di entrevista den prensa nos ...

editorial 2_40.jpg

KICO POR PAGA UN CONSEHERO? The sky is the limit?

E debate continuo na Colegio Arubano tabata trata tambe e asunto di salario di ...

Infrastructura digno di investigacion?

Tratamento di presupuesto a continua ayera, sin mehoracion di e gritamento riba e tribuna ...