‘Traha pelicula ta un experiencia cu mester un structura’

ORANJESTAD – Bon Dia Aruba a entrevista varios actor y persona cu ta den mundo di arte di cinema y creativo. Nan ta tuma lesnan di actuacion na Perfomers Platform na Cas di Cultura.

Tyler Green, un di actornan cu ta asisti lesnan di actuacion, ta splica cu e gusta pa motibo cu e ta siña mas di actuacion. Agregando cu e ta pasa ‘pa have fun’ cu speransa cu lo por hiba esaki mas leu y asina expande mas.

Locual sr. Green lo kier ta pa traha pelicula, pa aki 5 aña e ta participando den e parti di pelicula of actuando. “Mi ta spera cu mas e ta mas leu di locual e ta awo. E falta di departamento di pelicula ta grandi. Tin hende cu kier haci e trabou, pero no tin hopi ta coopera pa haci e, nan no kier yuda, no tin e luga, of no tin e placa. Spera esaki por wordo drecha.”

Sr. Green ta kere cu si di berdad un persona kier actua, sea den pelicula, comercial of cualkier otro cos, mester asisti les di actuacion. Si ta un hoben, adulto of mucha, pa nan sa kico nan ta haciendo ora nan bay graba, of actua. Sr. Green ta bisa tin ta nace cune, pero e ta algo cu mester eherce.

“No paso mi bisa mi ta bay actua, anto no sa cu ta bay traha pelicula, por portrait y haci un bon trabou. Pa e motibo aki mester lesnan”, sr. Green a splica. El a duna ehempel cu e ta mescos ora un persona cu ta bay scol pa cualkier materia, asina e por siña di dje pa sa kico e tin cu haci. E ta keda mescos cu actuacion, y tur arte cu mester siña con pa haci e y trece dilanti.

Jean Milo Croes, otro actor, ta splica cu locual ta falta mas den e parti di produccion di pelicula ta ‘mas structura’. “Na Aruba no ta tum’e na serio manera mester ta. Traha pelicula ta un experiencia, y mester tin structura di con pa haci e. Aki na Aruba nan kier djis ta den un pelicula, anto bisa rond cu e ta actuando, sin sa. Ami ta pensa esey mester mas etica, y purba di no djis pa ta den pelicula, pero pa sinti algo cu berdaderamente ta parti di nan bida.”

Segun sr. Croes, actuacion ta ‘bira un persona cu bo no ta’. E ta remarca cu e lesnan aki ta yuda pa structura e actor con ta actua den manera natural, en bes di djis bisa palabra. E ta un proceso di siña.

Bon Dia Aruba a puntra si tin suficiente productor di pelicula na Aruba. E ta contesta cu cinematografo tin na Aruba hopi, pero nan ta enfoca riba nan mes. Agregando cu nan no ta pone enfoke, ni nan talento, den traha pelicula. “Nan ta haci cosnan cu ta duna placa, manera video di casamento, fiesta, avisonan comercial, en bes di enfoca di locual nan gusta.”

Segun sr. Croes tin esunnan cu ta filma pa nan haya placa, no pa interes pa arte di cinema. Nan ta pensa den e placa di awo, en bes di haci algo cu pa futuro lo por duna nan mas placa cu awo, sr. Croes ta splica.

Pa locual falta na Aruba, ta pa hende ta bisa cu nan haci e arte di berdad y no haci e ‘pa profit’ pero lo contrario. “Hopi hende ta mata nan mes haciendo e arte paso nan kier cobra un cantidad hopi grandi di placa, pero si ta haci e pa placa y no ta bay pa enfoke cu ta arte, bo ta perde e meta di locual en berdad kier logra.”
Thierry Le Grand, kende ta studiante actualmente na Hulanda, pero a bin haci su stage na Aruba den parti di produccion, ta asisti e lesnan di actuacion di Perfomers Platfrom. E ta bisa cu diferencia grandi di Aruba y Hulanda, ta cu na Hulanda ‘tin mas oportunidad, y claro ta mas grandi’.

Den diferencia cu Aruba ta cu ora nan haci algo den produccion, ta e prome idea cu nan haya nan ta bay p’e. “Mi ta ripara esey na e propaganda, anto pa motibo mi a dicidi bay Hulanda pa por siña mas. Ora mi caba mi por bin y lo tin mas calidad. Bin tambe cu mas plan, ainda Aruba no ta pensa completamente.”

E parti cu sr. Le Grand ta bisa di e prome idea ta locual nan ta filma, no tur ora ta esun corecto. “Nan mester kibra cabes, bin cu variedad di idea pa despues scoge esun mas adecua. No tuma semper e prome take, sino keda haci e te ora haya e take perfecto y keda cla.”

Segun sr. Le Grand, e lo kere cu lo tin cambio den futuro. E ta remarca cu actualmente tin hopi hende cu ta haci e trabou ‘super bon y zuiver, pero tin cosnan cu falta ainda pa e nivel bay mas halto’.

A finalisa cu e meneer Charles Croes, cu ta bisa cu e idea di e lesnan aki ta pa siña e actornan di e basico te cu e dicon di locual kico nan ta haci, of dicon tur e resto. En bes di djis para dilanti camara pretende cu nan ta polis, gangster. “Mi ta pone nan envolve con nan ta siña nan con pa haci investigacion den nan parti.”

Segun sr. Croes, nan kier crece, manera lesnan cu actornan por sali den comercial of cualkier otro produccion cu lo tin na Aruba, cu mester actornan bon prepara. “E lesnan ta tuma luga na Cas di Cultura Incubator 1 room, di 7pm- 9pm. Nos tin un stage, vloer di palo pa movecion, e ta actuacion puro ambiente.”