5oct pisamento funcion Ansa.jpg

ORANJESTAD – Mediador di Gobierno, Sr. Anselmo Pontilius a expresa su positivismo riba e reunion cu a tuma luga diahuebs ultimo, entre sindicato STA y e compania ANSA NV, pa firma nan prome contracto colectivo (CAO) pa tres aña.

E compania a revisa nan cifranan y nan a haci un calculacion di loke lo costa si nan lo acepta e pakete total cu e sindicato a presenta. Tambe nan a haci un bon ilustracion riba nan entradanan y nan gastonan. Y finalmente e compania a presenta un otro oferta nobo cu e sindicato STA ta bay studia internamente cu nan delegadonan y miembronan.

Pisa e funcionnan
Pero un aspecto masha importante relaciona cu e discusion cu tabatin encuanto salario tin di haber cu lo bay evalua of pisa e funcionnan. Sr. Pontilius a bisa cu lo bin otro compania independiente pa realisa e trabou aki.

“Ora nan ta pisa e funcionnan ta pasa afo comparativamente si e salario cu ta wordo paga actualmente, con nan ta den comparacion cu otronan cu tin e mesun tipo di responsabilidad nan”, el a bisa.

Sinembargo Mediador di Gobierno a laga sa cu esaki no lo stroba e proceso, ya cu e pisamento di funcion cualkier compania profesional cu lo haci e trabou aki, lo tuma su tempo pa bin cla cu e resultado aki.

Mediador di Gobierno a recomenda na ambos parti cu si nan kier yega na un CAO ta nifica cu esencia ta denter di e realidad di e compania, kiermen cuanto placa tin disponibel, con nan lo ta parti nan y kico tin prioridad nan, etc…

Te fin di aña
E ta spera cu pronto STA y ANSA NV lo firma nan prome CAO pa tres aña. Ya cu a wordo trece den e mesa di negociacion cu e trahadonan tin te cu dia 31 di december pa dicidi si nan kier definitivamente forma parti di e compania; of e ta scoge pa keda un empleado publico den cual tin cu busca otro funcion pe.

Mirando cu e fecha ta acercando ta wordo papia cu esaki ta un forma di presion, pero Mediador di Gobierno a bisa cu nan a purba di trece trankilidad riba e asunto aki. Sr. Pontilius a bisa cu experiencia cu tin den e ultimo añanan na Aruba entre nan trahadonan di Setar NV, Post NV y recientemente ATA, caminda tambe e trahadonan tabatin e status di un empleado publico, nan a acepta pa bay over pa acepta e codigo civil y no e ley di ambtenaar.

Den tur esaki, Mediador di Gobierno ta haya importante pa enfatisa cu niun trahado por a bay atras den su condicion di trabou existente como empleado publico, y logicamente loke e compania ta ofrece ta un progreso e ta, tanto na salario como na beneficionan secundario.

 

LEAVE A REPLY

Please enter your comment!
Please enter your name here