(AP) – Investigadornan di New York a haci transplante di curason di un porco na dos pashentnan cu morto cerebral durante e ultimo luna, marcando e desaroyo mas actual den e meta di algun dia por yega na salba bida humano cu organonan di bestia.
E experimentonan anuncia riba diamars ta bini despues di un intento historico di usa e curason di un porco pa salba e bida di un homber cu tabata den proceso di fayece, marcando e test prome cu e cientificonan purba atrobe den personanan cu ta na bida.
Entre e lesnan cu nan a siña ta cu practica den personanan cu ya caba ta morto of lo fayece ta importante.
“Nos a siña asina hopi di e prome cu e di dos a bay di un manera hopi mas miho,” Dr. Nader Moazami, ken ta lider di e operacionnan na NYU Langone Health. “Bo ta para su dilanti asombra, ora cu bo mira e curason di un porco ta bati den e curpa di un persona humano.”
E biaha aki, Moazami su ekipo a imita con transplantenan di curason ta ser haci. Un biaha luna pasa, y e di dos biaha siman pasa, investigadornan a bay facilidadnan cu tabatin porconan geneticamente modifica, retira e curasonnan necesario, pone nan den ijs y a biaha cu esaki back na New York.
Nan a usa metodonan nobo, special pa revisa si tin presencia di cualkier virus di bestia peligroso prome cu nan a cose e curason den pecho di e pashent. Un veterano di Vietnam na Pennsylvania cu tin un historia largo di problemanan di curason y un muhe di New York cu a beneficia di un transplante di curason anteriormente den su bida.
Despues a bini 3 dia di testnan mas intenso cu pashentnan bibo cu por tolera esaki, incluyendo biopsia frecuente di e organo, prome cu dokternan desconecta nan for di e mashinnan manteniendonan na bida.
Ya caba Food and Drug Administration ta considerando si lo permiti un grupo chikito di pashentnan den necesidad di un organo nobo pa bira boluntario pa estudionan rigoroso cu sea curason of riñon di porco.
NYU langone ta entre 3 centro di transplante cu tin den plan e testnan aki, y tin un reunion plania cu FDA den augustus pa asina dialoga tocante e rekisitonan.
Test den e personanan cu ya caba a fayece por yuda mehora y perfecciona con e prome testnan den e personanan bibo ta diseña, Dr. David Klassen di United Network for Organ Sharing a declara, cual ta encarga di e nacion su sistema di transplante.
“Nan ta sirbi como si fuera un trapi,” Klassen a expresa, ken ta puntra su mes si e investigadornan pronto lo cuminsa considera monitor e organo pa un siman den un curpa duna den donacion na luga di solamente 3 dia.
Transplantenan di bestia-pa-hende, loke cientificonan ta yama xenotransplantation, tin decada caba den testnan sin exito, mirando cu e sistema inmunologico di ser humano ta ataca practicamente inmediatamente e organo stranhero. Awo, porconan ta ser modifica geneticamente pa asina nan organonan ta mas manera di un ser humano, aumentando e speransa cu algun dia nan lo por yuda yena e buraco cu ta causando un escasez di organo pa transplante.
