Minister Dangui Oduber a anuncia cu nos siguiente paso lo ta activa nos turismo. Y den cuadro di esaki lo bin cu un covid hotel, den caso cu ta wordo detecta turista cu tin Covid.
E ta haya cu nos ta cla pa habri nos frontera y kita e ‘lockdown.’ Actualmente Aruba tin e situacion bao control. Un hecho evidente ta cu no tin transmision di e virus pa varios siman. Aruba a bin cu diferente protocol, pero tambe lo bin cu control den nos aeropuerto. Nan ta tres capa di control (‘three-layer control): thermal camara, rapid testing y checklist cu preguntanan.
A pesar di nos urgencia economico pa habri nos frontera, te ainda no tin un fecha specifico sino tentativo, entre 15 di juni y 1 di juli, asina e mandatario a revela na Bon Dia Aruba. Un motibo cu nan a pone e fecha aki ta, pasobra ora cu nan ta habri nos frontera y ‘lockdown’ ta wordo lanta, Aruba mester por maneha e transmision local. Nan a traha riba esaki tambe na momento cu a dicidi di reactiva nos economia, locual ta tumando luga gradualmente na e momento aki for di tres siman pasa.
E mandatario a laga sa cu Aruba ta siguiente tur conseho for di Hulanda, instancia internacional y local, y nan ta sinti cu Aruba ta cla pa habri su frontera. Pero te ainda no a determina un fecha definitivo.
Covid hotel.
Un anuncio cu e minister di Turismo a haci y cu a hala atencion ta cu lo bini cu Covid hotel, unda lo wordo ubica e turistanan detecta cu e virus. Encuanto e idea di un Covid Hotel, e mandatario a aclaria cu no ta idea pa e hotel aki bira un semi-hospital pa atende e turistanan detecta cu e virus.
Oduber a bisa cu e intencion di e tipo di hotel aki ta cu e turistanan cu ta test positivo, sea na aeropuerto of den nan hotel caminda nan ta hospeda, y cu no mester atencion di hospital y cuido medico, lo por bay na isolacion na covid hotel aki. E mandatario no a aclaria si sorto di trahado lo atende e turista positivo den e hotel aki. Den caso cu e turista ta bira malo y mester di asistencia medico, e lo bay den isolacion na hospital.
Comments are closed.