Minister di Enseñansa, Ciencia y Desaroyo Sostenibel, Rudy Lampe a duna informacion rond di e proyecto di enseñansa online of e-learning. E ta un soño cu e mandatario kier a bira realidad prome cu Covid a dal nos cu tur su consecuencianan den tur area di nos comunidad, entre nan enseñansa. Pero con e ta wordo ehecuta? Con e ta wordo financia y kende ta tras di e proyecto aki.

Tin tres plataforma digital di e-learning pa desaroya e proyecto aki cu diferente fundacion encarga di dje: K12, Casa Grande y Griggs Internacional Academy.

Plataforma K12

Encuanto e envolvimento di e compania K12 cu ehecucion di e proyecto aki na Aruba, e mandatario a splica cu e ta un compania cu ta ofreciendo estudio online for di scol primario, secundario te hasta cu e posibilidad cu e persona por bay mas leu cu su estudio superior. Campus for Education Aruba ta e fundacion cu ta organisa K12 pa e studiantenan. Pa medio di e fundacion aki e mayornan ta paga pa e programa aki, asina e mandatario a clarifica na Bon Dia Aruba.

K12 ta un compania -segun e mandatario- cu ta creciendo rond mundo. El a haci referencia na un otro compania liga ta K12, esta Casa Grande cu ta ofrece e tipo di enseñansa aki na Spaño. Pues el a bisa cu actualmente nan ta trahando cu tur dos, K12 y Casa Grande. E proyecto aki ta tumando luga na Biblioteca Nacional Aruba, caminda el a cualifica cu e proyecto ta bayendo “biento en popa.”

E compania aki a yega di haya algun publicacion negativo. Recientemente Miami Herald a publica dia 2 di september 2020, un articulo bao e titulo: As cyberattacks persist, $15 million contract for online school platform never signed.

E articulo ta referi riba incidente cu a surgi cu e plataforma aki K12, den cuadro di inicio di scol na cuminsamento di september, caminda nan a referi cu e districto di Miami-Dade a adkiri e plataforma K12 cu a resulta uno problematico te hasta victima di atake cibernetico cu a interumpi e lesnan virtual. E hecho aki a paralisa e proceso di enseñansa online den scolnan publico na Miami-Dade.

 

Minister Lampe a bisa cu nan a haci e screening of chekeo riba K12, te hasta e representante di e compania a bin Aruba. Nan a yega di firma un acuerdo di entendimento(MoU). E mandatario ta na haltura cu 7 aña pasa tabatin algun noticia negativo “cu a wordo coregi.” Actualmente e compania aki tin mas cu 5 mil maestro. El a agrega cu e compania aki tin miles di alumnonan rond mundo.

Na Merca aworaki – segun minister Lampe – un estado tras di otro ta firmando MoU cu e compania K12. E ultimo noticia negativo cu e mandatario tin referencia di dje tabata na Florida. Pero el a laga cu e incidente aki tabata trata di un localidad ‘chikito’ cu tabatin problema cu e delivery di K12 pa falta di pago entre otro. “Pero por lo demas cu lo tin algo fraudulento na e momento aki, nos no ta na haltura di dje,” el a bisa.

Igualmente el a laga sa cu nan tin algun retraso pa start e proyecto aki na Prins Berhardschool (San Nicolas). Segun e mandatario e scol tambe lo bay tin e proyecto aki di Casa Grande. Nan ta bezig ainda pa loke ta oferta pa e aparatonan of ekipo digital manera iPad.

E minister a indica cu tin diferente consehonan cu ta drentando cu pa evalua e miho opcion. El a argumenta cu e problema principal ta debi cu aworaki den henter mundo tin hopi demanda pa e-learning, locual a trece cune cu tin un escasez di e tipo di aparato aki. Ademas nan ta tarda mas siman ainda pa nan por bin Aruba cu normalmente, y esaki ta un di e situacion cu nan ta enfrenta cu e proyecto aki.

Griggs Internacional Academy

E mandatario a menciona e fundacion di Adventista SOAZA ta encarga cu otro plataforma di e-learning.

El a bisa cu pa aña e fundacion aki ta maneha e kleuterschool JN Andrews Advent School na San Nicolas. El a laga sa cu SOAZA ta un fundacion reconoci pa haya subsidio di gobierno pa añanan. El a compara e fundacion mescos cu SKOA cu pa añanan nan ta ricibiendo subsidio di gobierno pa nan scolnan.

Segun e mandatario, SOAZA a haya e encargo di e e-learning aki, ya cu nan tin un vinculo cu Griggs Internacional Academy cu ta un sorto di K12 cu tambe ta ofrece e servicio di enseñansa virtual. Minister Lampe a laga sa cu esaki ta un motibo cu nan a haci escogencia pa nan, pa SOAZA impulsa e proyecto aki.

Inversion y Casa Grande

Cuanto a wordo inverti den e proyecto aki? Durante un conferencia di prensa dialuna ultimo e mandatario a declara cu loke nan a haya di financiamento di Hulanda ta esun cu a wordo uza pa e proyecto aki.

Minister Lampe a declara cu Hulanda a pone placa disponibel pa e proyecto di migrantenan Venezolano. “E problematica di refugiado di Venezuela,” el a bisa. Mayoria di studiantenan cu a inscribi aworaki pa sigui nan estudio online via Casa Grande ta Venezolano. E suma cu Hulanda a pone disponibel pa inverti den e proyecto aki ta 430 mil Euro. Fundacion Ban Yuda Aruba ta esun encarga cu e proyecto di e-learning aki.

Segun informacion compila pa e matutino aki e placa cu Hulanda a otorga ta solamente pa e proyecto di Casa Grande na Spaño, eigenlijk destina pa Prins Bernhardschool. No tin claridad con e otro dos proyecto di e-learning, esta K12 y Griggs Internacional Academy, tur dos na Ingles, ta wordo financia. Ta di supone cu nan lo wordo financia cu presupuesto di e mesun ministerio di enseñansa, ya cu nan no mag di uza placa cu Hulanda a destina pa enseñansa di migrante na Spaño

Destaho publico

Encuanto si e tipo di contract aki pa asigna un proyecto asina mester bay via un destaho publico, minister Lampe a trece dilanti cu “nos ta papiando aworaki di maestronan.”

El a bisa cu e proceso aki ta uno normal, mescos cu SKOA, tambe SOAZA ta contrata maestronan. Den e caso aki e maestronan cu a wordo contrata ta “coachnan” pasobra nan rol ta bira diferente debi cu e ta un sistema di scol virtual.

El a bisa cu e contratacion aki a wordo cubri caba cu parti di e financiamento cu gobierno ta destina pa e gasto aki pa medio di presupuesto di enseñansa. E no por bay via destaho publico. “E ta bay via contratacion di maestronan,” minister Lampe a declara.

Pa loke ta e cumpramento di devices manera iPad, eynan si nan tin cu cumpli cu e regla di comptabilidad, caminda si ta trata di un suma di mas cu 100 mil florin mester bin cu un destaho publico pa medio di ofertanan di diferente compania. Sinembargo el a indica cu tin excepcion “door di urgencianan” pa start un proyecto. E mandatario no a bisa si e proyectonan di e-learning a cay den e categoria aki. Pero si e mandatario a agrega cu a pesar di e excepcion cu tin, si nan mester cumpli cu e espiritu di bay pa e oferta mas faborabel pa no perhudica bo pais.