Senado awe a absolve Donald Trump di incita e atake riba e US Capitol, concluyendo un impeachment historico cu a expone e fragilidad di e tradicionnan democratico Mericano y a laga un nacion dividi evaluando e violencia cu a genera durante su presidencia.
E huicio rapido, e prome di un ex-presidente di e nacion, a mustra con cerca e invasornan a yega na destrui e tradicion profundo di e pais di un transferencia di poder pacifico, despues cu Trump a nenga di concede e eleccion. Reuni pafo di Cas Blanco, el a manda un multitud di sostenedonan pa ‘bringa’ p’e na e Capitol net na momento cu Congreso tabata certificando e Democrata, Joe Biden su victoria. Mientras centenares di persona a drenta e edificio, algun den bistimenta tactico participando den combate violento cu polis, legisladonan a huy pa scapa nan bida. Cinco persona a fayece.
E veredicto, riba un voto di 57-43, ta casi sigur di influencia no solamente e futuro politico di e ex-presidente, sino tambe esun di e senadornan cu a hura di otorga husticia imparcial como hurado. Siete Republicano a vota hunto e Democratanan pa condena, pero a keda leu di e dos tercer parti necesario.
E resultado despues di e disturbio ta laga sin resolve e divisionnan di e nacion tocante e estilo di politica di Trump cu a conduci na e atake domestico mas violento riba un di e tres brasa di gobierno Mericano.
