(AFP) – Presidente Donald Trump a presenta un vision ayera di un Merca militaristico no mara pa reglanan internacional den un discurso contrastando fuertemente cu suplica na e cuerpo mundial pa cooperacion y moderacion.
Trump a insisti cu Merca no ta bay join regulacion global di AI, y a urgi paisnan pa bandona e Corte Criminal Internacional (ICC) cu a keda instala pa persigui crimen di guera. E tambe a gana tocante control Mericano riba petroleo Venezolano, despues di caida di gobierno eynan na man di forsanan Mericano, bisando, “na e ganador ta pertenece e botin.”
Su declaracion mas controversial, sinembargo, tabata tocante e guera di casi siete luna na Iran. Trump a bisa cu e tin un “decision grandi” si ta haci un deal of ta “destrui e Republica Islamico y hacie lihe.”
E comentarionan divisivo di Trump na UN a yega despues cu lider saliente di e organisacion, Antonio Guterres a bati alarma tocante AI y a adverti cu “robot asesino no mester tin espacio den nos futuro.”
Mientras tanto, varios lider incluyendo presidente Turco, Recep Tayyip Erdogan; y emir di Qatar, Sheikh Tamim bin Hamad Al-Thani a usa discurso pa adverti cu futuro di e Palestinonan ta den un punto crucial mientras Israel ta expande den West Bank.
Otro paisnan cu nan lidernan a hiba palabra na e reunion anual emblematico di UN a bati alarma tocante intrankilidad global amplio, mientras algun a critica accion di Washington riba escenario global.
Merca y Dinamarca ta firma acuerdo tocante Greenland
Washington a firma un acuerdo di seguridad cu lidernan di Greenland y Dinamarca despues di menasa di tuma Copenhagen su teritorio strategicamente importante di Circulo Artico cu forsa.
Un seccion di e acuerdo, cu ta bay ta ser mira ampliamente como buscando pa stroba influencia Ruso, ta prohibi paisnan cu no ta di NATO ni di EU for di “sectornan strategico.”
Merca tambe ta bay construi dos base militar den sur y oriente di Greenland bao di e acuerdo.
Futuro di AI y cambio climatico
Secretario General saliente di UN, Guterres a haci un yamado entre Merca y China tocante futuro di AI, similar na acercamento entre Merca y Union Sovietico na e punto maximo di Guera Friu.
Pero Trump a rechasa regulacion internacional di e tecnologia, yamando propuestanan asina un “plan globalista.”
Tocante otro asunto central pa futuro di e planeta – cambio climatico – Guterres a señala specificamente companianan global di energia pa trata atmosfera como “un riool habri.”
Brasil no ta ‘cura’ di niun hende
Presidente di Brasil, Luis Inacio Lula da Silva, campañando pa reeleccion, a bisa cu su pais no ta fit den “cura” di niun hende – un referencia na declaracionnan di Trumpa impone su dominio riba henter e continente.
Lula tambe a adverti actornan tanto stranhero como domestico contra interferencia den eleccion na Brasil otro luna.
Cuba ta critica ‘falsedad’
Minister di Exterior Cubano a reacciona furioso na “falsedad” expresa pa Trump, kende a bisa UN cu e isla “ta bay cay.”
Delegadonan Cubano a bandona e sala durante discurso di Trump na un momento di relacionnan excepcionalmente tenso entre Washington y La Habana.
“Nos ta un pais di paz y nos merece paz,” segun Bruno Rodriguez, kende ta encabesando e delegacion Cubano na New York.
