Mas cu mitar di nos parlamento ta di biahe na Hulanda, supuestamente pa boga pa nos interesnan. Banda di e cuestionamento di e reunion bi-anual di e parlamentonan mes, si nan tin un efecto positivo pa e respectivo paisnan den Reino, awor ta bira tempo pa atende e asunto aki di representacion. Nos ta simplemente haci nos mes ridiculo na Hulanda cu e representacion hilarico aki. Pakico partidonan grandi di un pais grandi manera Hulanda ta limita participacion di e partidonan mas tanto posible, mientras Aruba, cu supuestamente no tin un huña pa rasca cualkier cos, ta subi avion cu un delegacion cu mayoria di e miembronan. Nan a kere cu ta vota ta bay vota aya? No cu nos sa.

En todo caso, a causa aki un daño financiero innecesario pa caha di gobierno, algo cu no ta cuadra cu e pretension cu gobierno tin di ta atende nos asuntonan financiero responsablemente. Asina dificil ta pa limita e participacion na presidente y vice-presidente di Staten, un miembro pa cada partido y un miembro independiente, si tin mas independiente mester tira lot o nan ta yega na un acuerdo ken ta bay y ken ta keda? Ademas, ta necesario reuni cada seis luna, si di baina nos por mira algun desaroyo o avance den e lunanan ey? No ta posible pa reuni riba cierto topico na cualkier otro momento di aña, ora ta realmente necesario, usando e magnifico medionan digital disponible? O ta simplemente considera cu e posicion di parlamentario ta trece cune cu cierto privilegio den forma di biahe?

Despues di ta gasta placa innecesariamente, y pa mayor contradiccion, ta cuminza e debate na Hulanda cu e ponencia cu Aruba no ta desea e ley di supervision financiero, den forma di un ley di Reino, e famoso RAft. Hulanda no ta sorprende ningun hende cu e contesta cu sin ley di Reino pa supervision financiero no por regla e asunto di debe cu Aruba tin di casi mil miyon florin. Y Aruba no tin otro opcion cu regla e asunto aki na un manera adecua, ya cu e ruta pa yega na otro capital internacional tambe ta core via Hulanda, cu e aprobacion necesario di gobierno di Reino di prestamo fuera di Reino. Y den e caso particular aki Aruba ta para su so, pasobra e dos otro islanan ta cay caba bao di un ley di supervision di Reino, pues no tin nada di bay defende pa Aruba loke nan tin riba nan caba.

Pero kico ta realmente e argumentonan clave di banda di gobierno di Aruba cu un continuacion di e supervision financiero no ta necesario? Esey lo mester ta basa riba e pensamento cu, despues di e debacle financiero causa pa e gobierno anterior, di 2009 pa 2017, actualmente lo tin suficiente muestra y prueba di un maneho financiero hopi mihor, asina bon mes cu Hulanda mester tin tur confianza cu Aruba mes lo por termina e ruta di recuperacion y mehoracion. Den serio? Kico asina? Esnan cu ta lesa e rapportnan di e progreso cu ta haci, o no ta haci, den e colaboracion existente entre Hulanda y Aruba pa logra e reformanan cu ambos banda ta sostene, por sa cu Aruba ta bastante aleha ainda di e momento cu lo por maneha e pais responsablemente pa loke ta finanzas publico. Mientras na cada ocasion cu presenta ta bin maha tocante e abolicion di supervision financiero, ta purba hustifica e tantisimo fayonan mustrando riba e escasez di personal profesional cualifica pa haci hustamente e tareanan complica aki. Ta coincidencia cu cada vez cu gobierno riba su propio iniciativa mester presenta un proyecto di ley, nan no por cumpli cu nan propio deadline, manera a sucede awor atrobe cu e ley di cambio di BBO? Ta politica barata pa cada vez mustra riba e rival democrata cristian cu a caba di hundi e pais financieramente, loke ta berdad, pero mientras tanto ta abo t’ey pa goberna y resolve problema. Si e pretension ta cu Hulanda mester tuma nos na serio, ta importante pa cuminza tuma nos mes na serio promer cu tur cos.

Pa bolbe na e cumbre parlamentario dos vez pa aña: banda di haci esaki solamente un biaha so, mester cuminza bira mas critico cu e temanan cu ta trata. Nos por imagina cu mester tin espacio pa trata tema di comun interes, manera e seguridad di dato personal digitaliza, unda ta mihor pa haci esaki den henter Reino, a base di e mesun reglanan cu mester ta den linea cu reglamentacion den Union Europeo y internacional. Aki ta unda nos mester reconoce cu ta dificil pa teritorio chikito den Caribe riba nan mes bay atende y carga gasto di e proyectonan aki. Esaki no ta solamente un cuestion di acuerdo den Reino, sino cu na Aruba mes gobierno mester cambia e mentalidad den e aparato cu ta demasiado contra centralizacion di informacion, cu na su turno ta haci acceso na informacion pa e propio trabao gubernamental mas facil.

Sin embargo, nos ta mira cu cierto malestar cu e reunionnan di IPKO ta keda pega den un ritual di mahadera riba cierto tema, manera e asina yama ‘deficit democratico’ y e ‘geschillenregeling’ kitando espacio pa e temanan di berdadero importancia. Fuera di e politiconan mes ningun hende na e isla aki a perde un minuut di soño pa via di e supuesto ‘conflicto’ cu Hulanda aki. Atende e asuntonan cu ta concerni pueblo, no e cosnan aki.