Tur compleho di apartamento…. Mester un carrental

Ta circulando copia di un peticion haci na ministro encarga cu Transporte, Comunicacion y Sector Primario, unda e persona, ta haci e peticion pa 10 permiso pa huur auto y 1 TO-vergunning.

Esakinan hustifica cu e argumento cu e mester di nan pasobra e ta doño di un compleho di apartamento y ta desea di por duna servicio di transporte na su clientenan. E carta a drenta te haya caba un aprobacion di e ministro concerni, completamente den e estilo notorio y altamente critica di e anterior ministro encarga cu infrastructura, e conocido “Accoord conform…” Riba su mes e firmamento riba e documento original no ta algo inusual y algun aña pasa e critica riba e ministro, di nos banda, en todo caso, no tabata pa e custumber ey, sino mas bien e rapidez increible pa core firma den un tempo asina cortico, cu tabata imposible pa controla e circunstancianan di e caso bon. Nos ta kere cu den e caso aki tambe ta bay bisa cu e ta nada mas cu un aprobacion ‘en principio’, basta cu den e investigcaion cu e departamento concerni mester bay haci, no bin topa cu cos cu ta haci aprobacion y otorgamento di e permisonan imposible. Ademas, den e caso aki e documento original a keda firma casi dos luna despues cu e peticion a drenta administracion gubernamental. Pero tin mas aspecto pa trata.

Pa cuminsa algun aspecto di formalidad. Nos ta corda cu den e famoso caso di e empresario Venezolano Roberto Rincon, bon warda awendia den prison na Merca, unda e ta haci peticion pa su compania di un tereno na Barcadera, ta omiti di tur banda, tanto di e mes como di e ministro, e tempo ey encarga cu Infrastructura, e formalidadnan cu normalmente mester respeta. Den e caso aya lo tabata corecto pa laga meneer, disculpa, señor Rincon sa cu si e compania ta desea algo, anto laga e compania haci un peticion formal, no cu e como accionista ta haci peticion. Gobernacion no ta deal cu accionista, sino cu e director estatutario di e compania. Sin embargo, e perdida di e normanan aki ta parce di a bira normal caba, pasobra den e caso actual nos ta bin topa cu e mesun practica. E peticion ta haci como persona, mencionando de paso cu e ta ‘director’ di un compleho di apartamento. Si esey ta e caso, y nos no ta duda di esey, lo no ta normal pa haci un peticion den e capacidad di compania?

Pero… un carta unda ni sikiera ta menciona nomber di e compania, no por keda acepta, pa e simple hecho cu no por averigua si en berdad ta existi un tal compleho di apartamento, unda e ta situa y ken ta e representante legal di e compania cu ta propietario di esaki. Pa varios aspecto e peticion no ta cumpli cu e minimo di informacion cu e ley di transporte publico ta exigi di un peticion pa por trata esaki. Si nos ta cuminsa pensa cu esaki ta puro formalismo, intento di ambtenaar pa stroba ‘proceso mas agil’ den gobernacion, nos ta riba loke na Hulandes yama un ‘hellend vlak’. Ta aki nos ta cuminsa move den direccion di un ‘republica bananera’ unda segun gusto ta pone procedimento apropia den gobernacion un banda. Awor, mirando e hecho cu e ministro a firma pa ‘accoord’ como dos luna despues, por ta posible cu e departamento concerni a haci su ‘due diligence’ mientras tanto. Den e caso ey lo ta mas grave ainda, pasobra lo nan no a detecta e multiple fayonan cometi den e caso aki cu ta rekeri coregi prome cu por sigui.

Anto nos no a yega ainda na e pregunta mas crucial: ser doño di un compleho di apartamento ta suficiente pa cualifica pa haya 10 permiso di huur auto? Pordona nos inocencia pero nos a kere cu bo mester tin un compania cu e meta explicito di duna e servicio di car rental na publico. E compania di e apartamentonan a bay regla pa amplia su metanan empresarial? Atrobe, no por comproba nada pasobra no sa e nomber di e compania, te pa sa ki meta e tin registra na Camara di Comercio. Si acaso ta trata di un NV o VBA, lo mester bay notario pa amplia e metanan di e compania y warda te haya aprobacion di departamento di asunto economico.

Loke ta decepcionante den e caso aki ta e manera di anda cu e cosnan aki, unda esaki ta sintoma cu nada no ta drechando den maneho gubernamental. Esnan cu a kere cu un cambio di gobierno lo ta suficiente pa caba cu practica incorecto den gobernacion, lo mester reflexiona. Y, lo mas grave di tur esaki ta: unda e funcionarionan publico para drechi den nan sapato a keda, cu mester mustra nan ministro cu e peticion aki ta inaceptable den e forma aki. Awor, si pa amistad o conveniencia politico no kier bay mucho duro riba e peticionario, no ta posible mustra su persona kico ta e criterionan cu cual su peticion mester cumpli pa por trat’e? Ta keda naturalmente e pregunta grandi: un compleho di apartamento mester su propio empresa di carrental?

You May Also Like

Debate KvK den otro situacion cu 2013

Corupcion lo ta e tema grandi?   Awe nochi por presencia e prome di ...

Aña 2016 a duna hopi di pensa

Den nos edicion di ayera nos a enfoca mas tanto riba e aspecto politico ...

Pone enseñansa publico na distancia di politica

Un paso logico? Nos ta keda den e dianan aki den e tema di ...

Aruba den centro di atencion di mafia internacional

Historia ta ripiti? Den añanan sesenta di siglo pasa, Aruba a logra subi lista ...

Dictadura ta haci caso di poder mas grandi cu nan…

Bista di henter mundo ta riba Venezuela den e dianan aki, y cu razon. ...

editorial 2_15_1.jpg

OPEC y perspectiva di petroleo

Oportunidad pa Venezuela?   E siman aki e organisacion di pais exportado di petroleo ...