A traves di un post riba su pagina di Facebook, Minister di Salubridad Publico, Dangui Oduber a anuncia cu tur establecimento mester cera pa 8pm.
“Entrante mañan (awe, diahuebs) TUR establecimento mester ta cera 8pm”, e mandatario a indica, enfatisando cu e mandato ta inclui supermercado, minimarket, convenience store, horeca y restaurant den hotel.
Casino, cinema y gym mester cera henter dia
Ademas, Oduber a indica cu entrante awe, tur casino, cinema y gym mester keda cera henter dia, forsando asina ceramento definitivo (maske temporal) di e establecimentonan aki.
Pa cu servicionan di cuminda, Oduber a bisa cu drive thru y delivery lo keda habri. Tambe Botica na warda, y pompstation, cu lo ta habri via bentana.
E medidanan aki ta vigente te dia 31 di maart proximo.
Nota di redaccion: Pompstation a keda menciona como un excepcion. No a keda cla for di e anuncio aki si pompstation lo keda habri te cu 10pm manera Prome Minister Wever-Croes a anuncia inicialmente, of si lo keda habri te cu 8pm.
