Turismo ta keda nos unico pilar economico y e driver principal di nos economia. Minister Dangui Oduber ta sumamente contento y alabes orguyoso cu e cifranan cu a wordo registra pa aña 2019 pa loke ta trata turismo di nos pais te cu awor.

Na 2018 tabata un aña record den turismo crucero unda mas di 815 mil turista a bin Aruba por medio di un crucero. Segun cifranan cu a ser ricibi di e aña aki ta premira di lo surpasa e cifra di aña 2018 na final di aña. Por ehempel diamars tabata tin 3 barco crucero aden y mas di 10 mil turista crucero sin conta e trahadonan mes di e crucero, sigur un bon dia pa nos economia. E cambio por wordo sinti den turismo y tur e indicadornan ta papia pa nan mes.

Segun e comunicado cu Bon Dia Aruba a ricibi ta indica cu , danki na turismo tin progreso economico y danki na turismo miles di persona na Aruba tin un entrada pa asina por mantene nan famianan. Den e desaroyo di turismo, turismo crucero tambe ta creciendo y ta premira di bira un otro aña record. Segun e mandatario aki por mira cu e inversion di 13 miyon florin den e tugboat Colorado na april di e aña aki ta dunando su fruta.

E mandatario a bisa cu e meta ta pa converti e turistanan crucero den turistanan stay-over. Pa haci esaki posibel cada persona na Aruba mester duna e turista e miho experiencia posibel pa nan bolbe regresa nos dushi isla. Pueblo mester ta consciente di e importancia di e sector turistico aki. Turismo ta nos forsa, ban proteha esaki, ban keda brinda e miho servicio y trato na nos turistanan y ban haci esaki uno duradero. Finalmente Minister Dangui Oduber sigur kier a gradici tur e empleadonan di APA, tur e empleadonan cu ta labora den e industria turistico y tur esunnan cu ta haciendo aña 2019 uno asina exitoso.

 

LEAVE A REPLY

Please enter your comment!
Please enter your name here