Esfuerso di Ucrania pa pone mas di 70 persona den cuarentena evacua for di China pa motibo di COVID-19 a cay den caos ayera, mientras residentenan local oponiendo e movida a lansa piedra na e evacuadonan y a participa den enfrentamento violento cu polis.
Oficialnan a condena e violencia, y minister di Salud di e pais a priminti cu lo comparti e cuarentena di e evacuadonan pa dos siman den un intento pa calma e manifestantenan, kende tin miedo cu lo ser infecta.
Bus cu evacuadonan abordo finalmente a logra alcansa e luga designa pa cuarentena despues di oranan di enfrentamento. E evacuadonan bistiendo mascara, exhausto pa e biahe largo, tabata mira a traves di e bentana di e bus mientras tabata core poco poco cu escolta di polis.
Piedra a kibra bentana den un di e busnan, pero ningun evacuado a mustra di a keda herida.
Desde mainta trempan, varios centenares di residente di e pueblo di Novi Sanzhary na region central Poltava a cera caminda na un sanitario unda lo aloha e evacuadonan, pa miedo di infeccion. Manifestantenan, algun di ken tabata parce burachi, a pone blokeo riba caminda, kima taira y enfrenta cu polis di riot, kende a move pa libera acceso. Un manifestante a purba di trapa polis cu su auto.
Nuebe agente di polis y un civil tabata hospitalisa, polis regional a bisa den un declaracion. A detene mas di 10 manifestante, y minister di Interior di Ucrania, Arsen Avakov personalmente a bishita e sitio di e protesta pa purba di calma e multitud.
Avakov a urgi e manifestantenan pa ‘no cay pa provocacion y tin comprension di e necesidad pa e medidanan temporal aki’.
Presidente Ucraniano, Volodymyr Zelenskiy a bisa cu e protestanan ta mustra ‘no e miho banda di nos caracter’. El a purba sigura hende cu e evacuadonan den cuarentena no lo representa ningun peliger na residentenan local. Den un declaracion riba su pagina di Facebook, Zelenskiy a bisa cu e hende evacua for di China ta saludabel y lo biba den un centro medico cera, maneha pa Guardia Nacional den e pueblo como un precaucion.
Minister di Salud, Zoryana Skaletska a bisa cu e lo join e evacuadonan den cuarentena pa dos siman pa yuda kita preocupacion di e ciudadanonan. El a urgi residentenan pa mustra simpatia y sosten na e evacuadonan, enfatisando cu e facilidad di cuarentena ta cumpli cu standard internacional.
Pero legisladonan municipal den e pueblo a priminti di sigui opone e evacuacion, bisando cu e sistema di pos di e sanitario ta conecta cu esun den e pueblo y ta termina den un facilidad di awa cercano.
Durante e enfrentamento entre residente local y polis, prome minister Oleksiy Honcharuk a bisa cu lo bula inmediatamente na e sitio pa personalmente supervisa.
Den oranan trempan ayera, un avion cu 45 Ucraniano y 27 stranhero a sali for di Wuhan, centro di e brote cu a infecta mas di 75mil persona rond mundo y cobra bida di mas di 2,100.
Esunnan evacua ta inclui hende di Belarus, Kazakhstan, Argentina, Ecuador, Costa Rica, Republica Dominicana, Panama y otro pais.
