Manera ya conoci Covid-19 a trece un reto inmenso pa Dr. Horacio E. Oduber Hospital. E Cuido Intensivo originalmente tabatin solamente 8 cama disponibel. Cu ayudo di Hulanda nos a yega na un maximo di 22 cama di ICU den e di tres y di cuater ola di Covid-19. Lastimamente, esaki no tabata suficiente.
Durante e ultimo simannan Hospital di Aruba mester a manda 30 pashent intuba pa Fundación Santa Fe de Bogotá (FSFB) y Hospital Internacional de Colombia (HIC) na Bucaramanga.
Un par di dia pasa ainda HOH tabatin admiti den Cuido Intensivo 19 pashent intuba/cu optiflow y 25 pashent intuba na Colombia. Tur hende por imagina cu sin ayudo Colombia nos lo tabatin un reto medico serio pa nos ciudadanonan di Aruba.
Durante tres dia recientemente un grupo chikito di Hospital a bishita e embahada di Reino di Hulanda na Bogota y tur dos Hospital na Colombia pa asina papia tocante algun punto manera e experiencia como team medico, e pashentnan y nan famia. Tambe pa siña di otro con nos por traha mas eficiente y efectivo pa nos pashentnan, dokter y tur otro stakeholder.
Hospital di Aruba a traha cu diferente afspraak pa den un futuro cercano comparti conocemento, teamnan medico, ekipo y air ambulance. Naturalmente un punto importante cu a toca tambe ta pa tene e porta habri pa pashentnan di Aruba den futuro.
Loke no por keda sin menciona ta e gratitud pa e ful e personal den e dos hospitalnan cu a cuida nos hendenan y pashentnan di Aruba. Di parti di HOH nos ta desea di gradici specialmente Dr. Victor Castillo, CEO di HIC, Dr. Jairo Roa, CMO di FSFB y Sra. Caroline Ramaekers, hefe suplente di embahada Hulandes, pa nan esfuerso y sosten!
