Despues cu dos terremoto fuerte a sacudi Venezuela na final di juni, e imagennan di destruccion y e situacion desesperante di miles di famia a move hopi curason, tanto na Venezuela como na Aruba. Pa un isla cu tin lazonan historico, familiar y cultural estrecho cu e pais bisiña, e reaccion no a tarda. Den cuestion di algun ora, cuatro persona – Alex Lovera, Orlando Garcia, Carlos Sanabria y Tina Faria – a reuni cu un solo proposito: haci algo pa yuda.

Loke a cuminsa manera un combersacion entre amigo y coleganan rapidamente a bira un di e mobilisacionnan humanitario mas grandi cu Aruba a conoce den añanan reciente. Sin un plan formal, sin experiencia den operacionnan di e magnitud aki y cu solamente e deseo di yuda como e punto di salida, nan a logra reuni un red di boluntario, empresa y donantenan cu a transforma un iniciativa chikito den un cadena di solidaridad di berdad.

Durante un encuentro di apreciacion cu a reuni hopi di e boluntarionan despues cu e prome operacionnan a conclui, e cuatro organizadornan a comparti nan experiencia y a reflexiona riba tur loke a pasa durante e dianan cu Aruba tabata trahando casi sin para pa reuni ayudo pa e comunidadnan afecta den Venezuela.

Alex Lovera a conta cu for di e prome momento tabata cla cu e protagonista di tur e iniciativa no tabata ningun organizador, sino e pueblo Venezolano cu tabata enfrentando un di e momentonan mas dificil den su historia reciente. Segun e, e necesidad di actua inmediatamente a supera cualkier preocupacion tocante planificacion of organizacion. E prioridad tabata reuni e mas hopi suministro posible y pone nan rumbo pa Venezuela mas lihe posible.

Manera cu yamadonan pa ayudo a cuminsa circula riba rednan social y den diferente grupo di WhatsApp, boluntarionan a cuminsa presenta spontaneamente pa yuda. Hendenan cu nunca antes no tabata conose otro a cuminza traha banda di otro, clasificando alimento, medicina, awa, productonan di higiene y otro articulonan esencial. Hopi tabatin trabao durante dia, pero despues di nan orario regular a dedica varios ora mas na e campaña di ayudo.

Tina Faria, un di e organizadornan, a expresa su agradecimento profundo pa tur hende cu a participa. Segun , ningun di e organizadornan a imagina cu e contesta di e comunidad lo tabata asina grandi. El a describi e campaña manera un “trabao di fruminga”, unda cada persona a aporta un tiki, pero hunto e resultadonan a bira extraordinario. E exito, segun Faria, tabata imposibel sin e cantidad enorme di boluntarionan cu a dedica nan tempo sin spera nada back.

E prome local caminda tabata organisa tur donacion a bira mucho chikito pa e cantidad di donacion cu tabata yegando diariamente. Caha tras di caha, pallet tras di pallet, e espacio no por a sigui atende e demanda. Esaki a haci cu e operacion mester muda pa un local mucho mas grandi na Paseo Herencia, unda e trabao a sigui durante varios dia casi sin interrupcion. Gobierno di Aruba tambe a subraya e iniciativa como un di e esfuersonan comunitario principal pa reuni ayudo humanitario destina pa Venezuela.

Cu e cantidad di donacionnan aumentando constantemente, e reto logistico tambe a crece. Cada caha mester a ser habri, revisa, clasifica, identifica y prepara pa transporte. Nada no por a sali sin control, pasobra e meta principal tabata pa haci cu e ayudo yega na e comunidadnan cu realmente tabatin mester di dje.

Segun e organizadornan, e compromiso di e boluntarionan tabata impresionante. Tin hende cu a dedica seis, ocho y hasta dies ora pa dia durante varios dia consecutivo. Nan a splica cu e trabao tabata fisicamente pisa, specialmente pasobra e local den cual nan tabata traha tabata hopi calor, door di cual e boluntarionan a cuminsa yama e lugar “e sauna”. A pesar di esey, casi ningun hende a keha. Pa hopi, e satisfaccion di sa cu nan tabata contribuyendo pa yuda otro hende tabata mas grandi cu e cansancio fisico.

Lovera a sigui splica cu conforme e operacion a sigui crece, e coordinacion diario tambe a bira mas compleho. Hopi decision mester a wordo tuma rapidamente conforme situacionnan nobo tabata presenta. No tabatin un manual pa sigui ni experiencia previo cu un operacion di e magnitud aki. Hopi solucion a surgi door di creatividad, colaboracion y e determinacion di e voluntarionan pa supera cada reto cu tabata presenta durante e proceso.

Na mesun momento, diferente empresa na Aruba a dicidi pone nan recurso na servicio di e campaña. Transporte, almacenamento, embarcacion, truck y otro tipo di apoyo logistico a ser ofrece boluntariamente pa garantisa cu e ayudo por sali for di Aruba y yega na Venezuela. E colaboracion entre sector privado, boluntario y donantenan a bira un di e elemento mas importante pa e exito di e operacion.

Despues cu e palletnan a sali for di Barcadera, un otro grupo di boluntario na Venezuela a sigui cu e proceso. E suministronan a ser descarga, reorganisa y distribui na e comunidadnan afecta. Segun e organizadornan, e proceso no tabata limita na entrega di caha, sino tabata enfoca riba haci cu e ayudo a yega directamente naesnan cu mas tabatin mester di dje.

Durante e encuentro di apreciacion, e organizadornan a presenta video y portret di e distribucion di e ayudo na Venezuela. Pa hopi boluntario cu a pasa dianan completo clasificando y cargando caha na Aruba, tabata e prome biaha cu nan por a mira e resultado concreto di nan esfuerso. E imagennan a confirma cu e trabao cu a cuminsa den un local chikito na Aruba, a logra su meta di entrega speransa na comunidadnan afecta na Venezuela.

Durante su reflexion riba e campaña, Lovera a subraya e magnitud di e esfuerso cu Aruba a logra. El a splica cu durante e operacion e isla a reuni y a manda alrededor di 80 ton di ayudo humanitario pa Venezuela. Pa ilustra e dimension di e iniciativa, el a menciona cu, segun un noticia cu el a lesa, Francia a dona alrededor di 40 ton di ayudo. Pa Lovera, e comparacion no tabata pa crea competencia entre paisnan, sino pa mustra con un comunidad chikito manera Aruba por logra un impacto extraordinario ora henter e comunidad uni pa yuda otro pueblo den momento di necesidad.

Mas cu e cantidad di ton manda of e cantidad di pallet prepara, e mensahe principal di e encuentro tabata enfoca riba e poder di solidaridad. Segun e cuatro organizadornan, e campaña a demonstra cu no ta necesario cu un solo persona haci algo extraordinario pa logra un gran diferencia. Ora cada persona aporta loke por – sea un ora di trabao, un caha di alimento, un biahe cu truck of un espacio pa almacenamento – e resultado final por supera tur expectativa.

E reunion tabata tambe un momento pa mira pa dilanti. Lovera a anuncia cu e espacio cu anteriormente a sirbi como e local pa ricibi tur donacion, e asina yama “sauna”, lo ser converti den un centro di rehabilitacion gratis pa comunidad local. E proyecto lo cuminsa atende mucha y hoben, cu posibilidad di amplia e servicio conforme e necesidad. Ademas, e grupo tin intencion di organisa un otro colecta di ayudo den september y un campaña di cos di hunga pa december, manteniendo e spirito di solidaridad cu a uni tanto hende durante e emergencia.

Pa hopi di e boluntarionan cu tabata presente durante e encuentro, e recompensa mas grandi no tabata reconocemento ni protagonismo. Loke lo keda cu nan ta e experiencia di a mira un comunidad completo uni pa yuda otro pueblo den un momento di necesidad. Den solamente algun dia, personanan cu no tabata conoce otro a bira compañeronan di trabao, empresanan a comparti recurso sin pensa dos biaha y centenares di persona a dedica nan tempo pa un meta comun.

E storia di e campaña ta un recordatorio cu solidaridad no semper ta nace for di organisacion of institucionnan grandi. Tin biaha e ta cuminsa cu cuatro persona cu ta tuma un decision simpel: no keda wak, sino actua. For di e prome yamada telefonico te e ultimo pallet cu a sali rumbo pa Venezuela, e iniciativa lidera pa Alex Lovera, Orlando Garcia, Carlos Sanabria y Tina Faria a demostra cu, ora un comunidad uni, hasta e desafio mas grandi por ser enfrenta hunto.