Diabierna prome di October ultimo den presencia di su directiva completo y invitadonan, Sra. Desiree “Daisy” Coffie a presenta e movemento politico nobo Movemento 21, abrevia M21. Movemento 21, pasobra e la lanta den aña 2021 y ta prepara pa siglo 21, E “vuurtoren”, torno como simbolo di direccion, di guia y di compas pa pueblo, hasta den temponan turbulento.  Cu un bos fuerte y determina Daisy a tene su introduccion, den cua e la menciona entre otro innovacion, integridad, participacion, inxclusividad,  solidaridad, y renobacion politico. Conceptonan cu e la priminti di lo bay duna nificacion cu accionnan concreto, pero cu diabierna no tabata e momento oportuno pa tira tur su balanan. 

Daisy tabatin un speech hopi cla cu ta inspira speransa y confiansa. E tin basta aña como miembro di Conseho Insular. Despues cu den un forma no elegante e mester a tuma despedida di partido MPB un aña pasa, e la bin ta funciona como miembro independiente den Conseho Insular. Den Conseho Insular Daisy Coffie a profila cu hopi critica y contribucion constructivo, pero tambe e tabata e bos pa mustra riba e maneho cu no tabata cana na interes di pueblo. Integridad den gobernacion tabatin su atencion special. Semper respetando su coleganan e la mantene un nivel cu sigur a distingui y cu a haci diferente. Cu lantamento di M21 e ke sigui duna e interesnan di e pueblo un bos. Na un manera determinante, e la mustra cu mester bay bek mesa cu Hulanda pa logra cu e relacion cu Hulanda semper mester tin como meta bienestar di e pueblo Boneriano. E relacion actual segun Daisy, no ta cumpli cu esakinan y e no ta satisface e pueblo. Na mesa cu Hulanda e discusion mester ta: mehora loke a bay bon den e ultimo 11 añanan, corigi loke a bay robes y acorda puntonan cu no ta den e acuerdo actual y cu merece atencion.

Segun Daisy a yega e ora pa nos como pueblo contesta e preguntanan cardinal y fundamental:Ken nos ta? Ken nos ta como Boneriano? y kico nos ke?

Ta importante pa  nos contesta e preguntanan aki. Pa mundo y pa otro. Nos lo subi hunto of nos lo cay hunto como un pueblo, asina Daisy a sigui trece dilanti. Si nos ta uni di berdad, ningun hende lo por tene ningun otro abou ni atras.

E lucha di e movemento lo ta pa sali na vanguardia di e pueblo, cu ta nifica lucha na nomber di sobrevivientenan di varios inhusticia, contra probechadonan, contra silencio inhusto, stigmatisashon, discriminacion, desigualdad, etc.. Papiando cu hopi hende, Daisy ta convenci  cu e tempo ta apropia, pasobra hopi ta preocupa pa e rumbo cu nos ta bayendo.

Den e tempo binidero lo bay mira e presencia di e movemento aki den tur skina aki na Boneiro y un yamada ta ser haci na un y tur pa uni  nan mes cu e movemento sin importa di cua religion bo ta, di ki descendencia bo ta bin, cua orientacion sexual bo a scoge o cua partido politico bo a vota pe. E movemento ta pa un y tur cu realmente no ke sigui para na banda mas y ke duna su aporte pa chiki cu e por ta pa haci e diferencia. Pronto lo habri e oportunidad pa tur hende cu ta desea bira miembro di M21, registra nan mes y asina fortifica e movemento. Hunto cu M21 nos ta bay ta E DIFERENSIA.