Un Pasco y fin di aña diferente yen di medida y recomendacion contra Covid

Diabierna ultimo, Prome Minister Wever-Croes a anuncia un serie di medidanan nobo cu a drenta na vigor diasabra ultimo pa un periodo di dos siman. Nan ta medidanan cu tin di haci cu establecimentonan y encuentronan social y familiar loke ta permiti y loke no ta permiti pa asina evita mas contagio di Covid.

Logicamente e celebracion di Pasco y Fin di Aña no lo ta algo manera aña pasa, caminda tabatin un gran aglomeracion di hende pa comparti hunto e cendemento di pagara di cantidad di tiro ariba baolevard. Algo asina no por tuma luga actualmente.

Ni si e cifranan di contagio nobo y esunnan positivo ta baha hopi. No ta permiti aglomeracion tanten cu e vacuna no a wordo introduci debidamente.

Pasco y fin di aña diferente

Bon Dia Aruba ta publica algun recomendacion di Organisacion Panamericana di Salud (OPS) den cuadro di e pandemia di Covid y mirando e fiestanan venidero.

Cualkier scenario den cual tin hopi hende reuni ta trece cune un riesgo pa haya COVID. A pesar cu e dianan cu ta nos dilanti ta un oportunidad pa celebra cu famia y otro hendenan cercano, mester tene hopi cuidao mas tanto si e reunionnan aki ta inclui personanan grandi di mas cu 65 aña. Of personanan cu malesanan di base. Tambe mester tene na cuenta si e comunidad unda nos ta biba e numbernan di caso ta na aumento manera ta e caso di Aruba.

Recomendacionnan di Organisacion Panamericano di Salud pa celebra e fiestanan di fin di aña. Si bo persona a wordo diagnostica recientemente cu COVID, of tin algun sintoma relaciona cu e malesa. Of bo tabata den contacto cu un persona cu a haya e malesa, nan ta recomenda pa no organisa ni participa den ningun reunion, te ora e periodo di cuarentena a caba.

Varios paisnan Europa a anuncia protocol y plan pa celebra e fiestanan di fin di aña di un manera diferente. Pa e region di America, e Organisacion Panamericano di Salud (OPS) ta recomenda tur e paisnan seriamente pa pospone of reduci e reunionnan masivo manera e ceremonianan religioso, benta di Pasco masivo y cualkier aglomeracion.

Jarbas Barbosa kende ta subdirector di OPS a bisa: “Esaki no ta momento pa bira anfitrion di ningun reunion cu hopi hende. Cada pais, mester basa nan decision tumando na cuenta e ultimo datonan disponibel, specialmente den comunidadnan unda e propagacion di e virus ta subi.”

E aumento asina grandi di casonan na Europa y e cantidad di casonan na America Latina a obliga e gobiernonan pa tuma medidanan nobo dilanti e pandemia y Aruba no ta un excepcion.

Tocante e pruebanan cu e paisnan ta exigi ora di biaha (manera e prueba di PCR) a pesar cu ta un herment importante pa track y combati e virus plama, mester ta hopi cauteloso pa e pruebanan no duna un sensacion falso di siguridad. Por pasa algun dia prome cu un prueba por diagnostica un infeccion pa Covid, si test ta wordo haci mucho lihe, e persona por resulta negativo, pero e ta infecta y contagia otro hende, asina Barbosa a declara.

Con pa reduci e riesgo

Centro di Prevencion di Malesa CDC ta recomenda cu e manera mas sigur pa celebra e dianan aki ta keda na cas y celebra solamente cu esnan cu bo ta biba. Si bo ta reuni cu personanan cu no ta biba cu bo por aumenta e chens di haya of transmiti e malesa. Si toch bo ta haci algun reunion durante e dianan festivo mantene gruponan chikito y permanece pafo den espacio habri si ta posibel.

Ora bo ta cu hende cu no ta biba cu bo recorda e 3M: Mask (tapa boca), Mantene e distancia y Man bon laba. Corda cu ta obligatorio e uso di tapaboca si bo ta cerca di hende cu no ta biba cu bo.

Biahamento y reunion

Semper mester haci un prueba di Covid (PCR) prome cu e biahe of bishita famia pafo di Aruba. Corda semper cu un prueba Negativo solamente ta duna informacion tocante e momento ey. Un test negativo no ta nifica y bo lo sigui ta negativo den cualkier tempo despues di e prueba. Toch sigui mantene e distancia y aplica tur e medidanan di siguridad.

Encuentronan

Si toch bo ta dicidi di haci un reunion, pidi tur esnan invita pa evita strictamente e contacto cu personanan pafo di nan grupo familiar pa dos siman prome cu e reunion. Corda tur bo invitadonan pa keda na cas si nan tabatin contacto cu persona positivo na COVID den e ultimo dos siman. Of si nan tin sintoma di COVID. Haci limpi e superficie di contacto comun manera e handel di e portanan, e yabinan di awa di e laba man, prome cu e invitadonan ta yega y tambe cada cierto tempo.

Mantene un lista di invitado mas chikito posibel. Ora bo a dicidi caba cuanto hende bo ta invita tene na cuenta e espacio y capacidad cu bo cas tin, di manera cu por tin distanciamento social. Corda cu tur reunion ya sea encuentro social of familiar e maximo di cantidad di persona ta 30 paden y 60 pafo.

Durante e reunion

Ta recomendabel si ta posibel pa organisa e reunion den espacio habri. Si ta paden habri tur bentana y porta. Pone e stoel y mesanan di tal manera cu nan ta keda leu for di otro. Personanan di un mesun grupo familiar por sinta banda di otro, pero si nan mester mantene e distancia y tambe di otro gruponan familiar. Ta importante pa e personanan usa tapa boca ora nan no ta comiendo of bebiendo. Corda pa tur hende laba nan man constantemente. Instrui e pesonanan pa no drenta y Sali hopi na e lugar unda ta preparando of maneha cuminda manera e cushina of rond di e grill. Asigna un hende so pa sirbi tur e cuminda, di e manera aki bo ta evita cu e cosnan pa sirbi cuminda ta wordo maneha pa diferente hende.

Compra

Ta recomenda pa no acudi na luganan unda tin hopi cliente ta reuni. Of unda cu tin hopi hende para den rij ta warda pa e tienda habri. Check si e tienda ta ofrece e posibilidad di haci compra online. Check e oranan cu e tienda ta habri y purba bay haci compra na oranan menos concuri. Check si e tienda tin orario special pa hende di riesgo halto. Usa tapa boca y hand sanitizer. Purba no mishi cu hopi articulo den tienda. Djis mira. Cumpra solamente den luga cu nan tin protocol bon in place. Ora yega cas for di haci compra laba man pa por lo menos durante 20 seconde.

Actividadnan di riesgo abao

Cena di Pasco solamente cu esnan cu ta biba cu bo. Prepara recetanan tradicional pa e famia y bisiña; y miho hiba cuminda pa nan pa evita mas tanto e contacto directo cu nan. Cena virtual ta un opcion.