Un parti chikito di e poblacion di Venezuela a bay vota ayera, por conclui di e exceso di material fotografico y audiovisual cu a aparece riba medionan di comunicacion. Esey naturalmente ta importante pa oposicion, cu no tabata por ni tabata desea di participa bao di e circunstancianan aki. Nan por mira esaki como prueba di nan razon, den e sentido cu pueblo a rechaza di manera cla e eleccion pa e organismonan legislativo, principalmente pa Asamblea Nacional.

Esaki sin embargo pa varios motibo practicamente no tin relevancia. Sigur un grupo considerable di pais di peso na nivel internacional, manera Merca, e paisnan di Union Europeo, Canada y otro paisnan di e continente aki, lo condena e suceso di forma tahante, pero e pregunta ta ki peso esey ta pone den e balanza na final di dia. Pasobra posicion di oposicion no a bira mas facil.

Cinco aña pasa, na december 2015, despues cu Nicolas Maduro a bin na poder na 2013 como sucesor di Hugo Chavez, e Chavistanan a comete e ‘eror’, den nan propio vista, di organiza eleccion parlamentario cu participacion di tur grupo mayor politico. Na e momento ey e disgusto di pueblo cu e Chavistanan tabata asina grandi caba, cu el a bira un victoria aplastante pa e partidonan di oposicion, cu conhuntamente a pasa na ocupa un mayoria absoluto den e parlamento. E persecucion cu a cuminza casi di inmediato tabata un di e factornan constante cu mundo por a mira di e poder Chavista, cu tabata domina den tur otro area di gobernacion di e pais, y mas importante den esaki tabata e hegemonia absoluto den e cuerponan policial y militar. E realidad ta cu den e cinco añanan aki no a mira ningun cambio den e gara cu e regimen tin riba e pais. Y, manera e corant Spaño ABC a formula esaki contundentemente: “ Maduro se apropia hoy del Parlamento de Venezuela en unas elecciones fraudulentas”. Den preparacion di e eleccion aki e poder Chavista tabata controla tur organismo di importancia, di e Conseho Nacional Electoral, Tribunal Supremo, tur urna electoral den henter e pais, e sistema digital cu ta usando. Irespecto e cantidad di voto cu berdaderamente tabatin, gobierno di Maduro ta declara e eleccion un exito rotundo, y na januari ta instala un Asamblea Nacional, cu un composicion mayoritariamente Chavista, cu algun puesto pa e partidonan di menor importancia cu a participa tambe. Nan lo core cu e actual miembronan opositor di e Asamblea Nacional, cu desde 5 di januari proximo lo ta ciudadano comun y coriente. Mundo por grita cuanto cu nan kier, e dictadura lo keda insisti cu nan eleccion tabata legitimo, y e pregunta ta kico realmente oposicion politico na Venezuela por haci. E contesta ta: masha poco. Sigur ta cu nan lo haya apoyo moral y verbal for di e paisnan menciona, pero esey no ta haci nada pa cambia e corelacion di poder na e pais.

Ademas, manera cos ta mustra pa varios aña caba, intervencion arma for di exterior lo keda un ilusion. E unico nacion cu tin e poderio militar pa haci esaki, a demostra caba di no ta bay hinca mas di nan ciudadanonan den peligro pa scapa otronan. Nos lo keda mira mas di e politica di simbolismo solidario, pero no algo concreto cu lo conduci na final di e regimen mas criminal den historia di America Latino. Y esnan, entre Venezolano na nan pais o den exterior, o di otro nacion, cu a kere cu na dado momento e situacion socio-economico lo a conduci na un caida automatico di e regimen, nan a keda desilusiona pasobra e regimen a mustra un forza extraordinario di mantene control riba e cuerponan arma, y mester atende un oposicion puramente politico, cu no a opta pa cuminza un lucha arma contra e dictadura. Esey ta parce un opcion hopi democratico y hopi humano, pero contra un regimen delincuente asina bon organiza, esaki no ta brinda naturalmente ningun perspectiva pa deroca e regimen.

Ademas por mira den ultimo añanan un apoyo mayor di aliadonan politico manera Iran, Cuba y Rusia, loke lo mester ta un preocupacion mayor pa gobierno Mericano. No tin claridad ainda kico gobierno di Biden lo hiba como maneho den e asunto aki, unda, manera bisa anteriormente, interveni abiertamente no ta parce un opcion. Y cu esaki ta habri e perspectiva di un regimen dictatorial cu por mantene su mes pa basta aña ainda.

Tur esaki logicamente tin consecuencia pa Aruba y e otro islanan Hulandes cu ta bisiña directo. Cu mas persecucion di tur loke ta oposicion na e pais den e proximo tempo, ta di anticipa cu lo tin un fluho mayor di refugiado cu ta trata di sali di e pais, tambe pasobra e situacion economico lo no mehora, al contrario. Pregunta anto, pa gobierno di Aruba, ta si mester habri frontera cu Venezuela. E contesta corecto ta parce nos: absolutamente cu no, ni cuanto gobierno Hulandes ta pensa otro, pa proteha otro interesnan economico cu nan por tin na Venezuela. Nos tin bastante problema di nos mes pa resolve pa haya tambe mas refugiado den e proximo añanan, sin cu tin un regreso na democracia na vista cerca nos bisiña grandi.