Raiz:

‘Ningun di e ministernan a cumpli cu e peticion di Raiz’, ta loke Ursell Arends (Raiz) a expresa ayera atardi na un conferencia di prensa. E USB stick cu nan a ricibi di minister di infrastructura y medio ambiente, Otmar Oduber (POR) riba proyecto Isla di Oro, tabata un asina yama ‘kat in de zak’.

Mientras ni minister di turismo ni minister di asuntonan economico a duna un contesta riba e partido su peticion den cuadro di ordenansa nacional di transparencia di gobernacion te ainda. Alabes e informacion cu nan a ricibi digitalmente di sr. Oduber no ta loke e partido a pidi.

E documentonan cu nan a ricibi di e minister den cuestion tabata pa gran parti documentonan comercial cual e desaroyadonan mes a entrega na e minister. “Pero nos peticion mes cual ta pidi diferente documentonan di e departamentonan, nos no a haya riba e USB y p’esey nos ta spera cu e ministernan concerni tuma Raiz su peticion ainda y na serio.”

Riba un comunicado separa cu Raiz a manda nan a splica cu esaki tabata ‘un oportunidad perdi pa un minister cu kier demostra su maneho transparente’.

Un di e unico documentonan cu e partido a haya cu no tabata comercial, tabata e Milieu Effect Rapport (MER) cual ta delinea cua lo ta e consecuencia negativo of positivo di un proyecto of maneho riba medio ambiente. E partido ta considera esaki un file incompleto y ta dispuesto di mira esaki manera un pakete preliminar. “Mi ta sigur cu mester tin mas documento, pasobra si nos kier haci proyectonan asina mi ta sigur cu tin mester di mas informacion” , sr. Arends ta bisa.

Den e comunicado cu minister di medio ambiente a manda unda ta delinea kico tur a manda, a comenta cu nan no a haya un traspaso debido di parti di gobierno anterior, pues nan a entrega loke a haya di e desaroyadonan. Segun e comunicado: “Mirando cu gobierno na e momentonan aki no a tuma un decision den e proyecto aki, a bisa cu e maneho/ liña cora cu tin den e ministerio y den e gobierno den su totalidad, ta uno cu mester crea un balansa entre desaroyo infrastructural y e cuido di nos medio ambiente”

Riba e pregunta si Raiz ta kere cu gobierno tin e documentacion aki ainda, sr. Arends a expresa cu ‘ningun departamento por comunica sin pasa por medio di minister. Pues nos ta kere na final di dia cu tur 3 minister mester tin e documentonan’.

Pidiendo documentacion adicional

E partido ta pidi e documentonan pa por haya un vision mas amplio di kico ta e conseho di departamentonan manera Departamento di Naturalesa y Medio Ambiente (DNM), cu ta trata e area importante di Isla di Oro, cual sr. Arends a yama ‘un area di naturalesa dobel’. Esaki mirando cu aki tin tanto coralnan como mangelnan, formando asina un eco-sistema amplio riba un area concentra y ‘hopi serio pa loke ta trata medio ambiente di Aruba’.

Raiz no ta contra e desaroyo di e proyecto aki, ni pro, pasobra nan ta keda para cu ‘pa nos bin na un conclusion nos tin cu wak e echonan y informacion cu ta eyfo riba e topico. Nos no ta haci conclusion a base di emocion’

Mirando cu den cuminsamento di luna pasa a tene un manifestacion, envolviendo entre otro organisacionnan manera Aruban Warriors, Accion Ambiental y Aruba Birdlife, minister di turismo Dangui Oduber (MEP) a splica cu nan lo mester considera pa bin cu un sondeo adicional independiente pa determina cua direccion lo mester bay cu e proyecto, teniendo en cuenta tanto desaroyo como interes di comunidad.

‘75 pa 200 camber sigur no ta un boutique hotel’
Esaki mirando cu e minister a considera cu mirando cu refineria ‘tur hende sa lo bira na nada, pues turismo so nos tin’. Riba e preocupacion cu ta reina den comunidad unda cu no kier pa bin mas desaroyo riba escala masal, sr. Arends a añadi cu ‘pueblo di Aruba a papia cla na diferente manera, entre otro cu e Destination Development Plan cu mira pa futuro. Nan no kier mas hotel, ni mas condominio, solamente boutique hotel’.

Sinembargo segun sr. Arends, mester bin na un definicion corecto di kico ta encera e terminologia di un boutique hotel. “E mocion cu a pasa den parlamento ultimo ta bisa cu un boutique hotel ta entre 75 pa 200 camber. Pero si bo bay bek na kico World Tourism Organisation ta defini como boutique hotel, 75 pa 200 camber sigur no ta un boutique hotel. Esey ta terminologia cu mi ta kere cu na Aruba nan lo a introduci, pero esaki sigur no ta un boutique hotel.”

Na final Raiz a invita pueblo henter na un simposio di naturalesa cu nan a organisa, unda a haya cooperacion di Natalia Greene di Global Alliance for the Rights of Nature. Di e manera aki ta spera cu por informa pueblo cu nan tambe por ta activo den boga pa derechonan di nos naturalesa, mirando cu sra. Greene a haci esaki pa Ecuador, te cu su persona a logra boga pa trece derechonan di naturalesa den Ecuador su constitucion. E simposio titula Derechonan di Naturalesa lo tuma luga 9 di juni na aula di Universidad di Aruba. Lo tin oradonan tambe local y entrada lo ta gratis.