Departamento di Salud Publico (DVG) a informa par di dia cu pasa cu diasabra 11 y diadomingo 12 di september nan tabata organisando un otro jornada grandi di vacunacion pa esunnan cu a haya nan prome shot tres siman pasa y pa otronan cu te ainda no tabata dicidi di tuma e vacuna.

Chris Goedhart, persona cu ta coordina e programa di Vacunathon, a splica cu den e dos dia aki casi 3.000 persona a bay vacuna. Esaki ta nifica cu nan a vacuna 2.5% di henter e poblacion di 12 aña bay ariba na Aruba, algo cu nan ta considera hopi grandi.

Ainda ta falta casi 10.000 persona pa vacuna pa asina logra e meta di herd immunity (inmunidad di grupo door di vacuna) di 85% y esey ta e motibo cu DVG ta bay sigui duna comunidad di Aruba e oportunidad pa vacuna. Otro siman nan lo tin dos localidad pa vacuna, un na DVG mes y otro na Imsan tambe.

Pa personanan mayor di 60 aña nan tin walk in y tambe pa esunnan cu te ainda no a haya e di dos vacuna y cu a cumpli cu e tres siman caba despues cu a haya e prome shoot.

Segun minister di Salud, Dangui Oduber, e situacion actual na Aruba ta un tiki mihor. E cantidad di casonan ta bahando y hospitalisacion tambe. Tin un gran cantidad di pashent cu Covid ta wordo manda Colombia y esaki ta pone hopi presion riba gastonan di AZV.

“Nos a haci un yamada na comunidad di Aruba pa bay masalmente vacuna y nos ta hopi contento y agradecido cu un biaha Aruba a responde na e yamada pa bay vacuna. For di mainta trempan nos a nota e entusiasmo den nos hendenan pa vacuna y e dia tabata uno hopi fructifero y exitoso”, Oduber a comenta den un comunicado di prensa. “Nos a pone como meta pa nos por vacuna riba 2000 mil persona e weekend aki. Un total di 835 persona a haya nan promer shot y 1851 persona a haya nan di dos shot. Como minister di salud mi kier a gradici di curason un biaha mas cada un persona cu a bay vacuna, ministerio di turismo, salud publico y deporte, henter e team di vacuna di DVG, tur e boluntarionan di Svb/AZV, ATA, AHATA y sigur un danki special na Ritz Carlton pa pone nan ballroom disponibel un biaha mas pa logra un otro Vacunathon super exitoso.”

Pa finalisa, e mandatario a urgi tur ciudadano pa continua cu e protocolnan di higiena. “Ban sigui cuida, ban sigui laba nos mannan frecuentemente, ban sigui mantene distancia social, ban sigui bisti tapaboca y ban tur hunto den union sali for di e crisis aki. Mi ta convenci cu hunto den union nos lo vence.”