Vacunathon Infantil, mas di 400 mucha a vacuna

Den fin di siman a tuma luga e Vacunathon Infantil pa muchanan di 5 pa 11 aña di edad na Centro Libertador Betico Croes. Den un conferencia, Dr. Jennifer Kwika, dokter di e programa di vacunacion di DVG a splica un poco ariba e vacuna y consecuencianan cu esaki por tin of no. Sra. Dahariana Evertsz, Head of Health Promotion na DVG a splica con e proceso di vacunacion mes a tuma luga.

Dr. Kwika ta un dokter Venezolano cu desde februari di aña pasa ta trahando den e programa di vacunacion na Aruba. El a expresa cu den su opinion e ta un privilegio pa e muchanan tin nan vacuna, pasobra ya nos ta drentando otro etapa den e pandemia. El a enfatisa cu ta hopi importante pa e muchanan ricibi nan vacuna pasobra e ta algo pa preveni locual ta un pandemia na nivel mundial.

Splicando un tiki di e vacuna, el a bisa cu e muchanan ta ricibi e vacuna Pfizer, den un dosis mas chikito, un dosis di pediatria. Segun el a indica, nan ta usa e un dosis calculando e peso di e mucha, entre otro, y tur esey nan ta calcula prome cu ehecuta of finalisa e proyecto di vacunacion di e muchanan.

Kwika a remarca cu pa yega na un vacunathon infantil nacional tin un planificacion prome. El a splica cu pa por ehecuta e programa di vacunacion infantil tur e ekipo mester a haci un capacitacion adicional, mester tin full conocemento di kico e vacuna ta, kico e reaccion di e mucha por ta.

“E no ta algo cu ta diripiente, e ta algo cu ta planifica di hopi tempo atras Realmente e planificacion a cuminsa desde e mesun tempo cu a cuminsa vacuna hende grandi pasobra nos ta pensa ariba tur hende y esey ta inclui mucha tambe. Di berdad nos ta pensa cu mester hiba un alivio pa e mayornan di mucha pasobra scol a cuminsa y tur hende ta purba evita e riesgo di contagio. Pero si nos wak bon nos mester sigui nos bida normal pasobra e ta un virus mescos influenza, mescos otro virus cu anteriormente t’ey caba y nos ta prepara, capacita pa por bringa contra tur cos cu ta presenta den bida”, el a indica.

Segun el a bisa nan ta studia e consecuencianan di e vacuna prome cu nan duna e muchanan y adultonan tambe. El a splica cu den su caso personalmente e ta studia e riesgo cu fast food tin riba hende y loke e vacuna ta haci. Dr. Kwika a enfatisa cu realmente si nos tin informacion di berdad por wak cu tin un 90% mas daño locual colesterol halto ta haci compara cu e daño cu e vacuna aki ta haci.

“No tin ningun consecuencia pasobra e ta un RN mensahero, mescos cu nos tin den nos curpa. Pero e ta wordo traha den un laboratorio Pfizer, den e caso aki. E no tin ningun consecuencia ni despues di dos of tres aña. Solamente e ta inmunisa of eleva e sistema inmunologico, den e caso aki esun di e muchanan.”

Sra. Evertsz, a splica cu e vacunathon tabata habri pa tur mucha y den e caso di muchanan cu no tin status legal na Aruba, nan tambe por a presenta pa ricibi nan vacuna. Unico rekisito ta cu nan mester presenta un paspoort valido cu por demostra cu tin mas di tres luna bibando na Aruba.

El a sigui splica cu prome cu vacunacion tuma luga e muchanan a ta pasa den un proceso di triage caminda nan ta identifica si e mucha por tin algun malesa, si e mucha tin algun alergia of si e tabata malo recientemente. “Durante e proceso di triage tur e preguntanan aki ta wordo haci prome cu e mucha por ricibi su vacuna. Tin algun mucha cu no a wordo vacuna pasobra nan tabata un tiki keintura”, el a agrega.

Durante un conferencia di prensa dia 17 di januari Minister di Salud Biblico y Turismo, Sr. Dangui Oduber a splica cu nan a tuma decision pa vacuna muhenan di 5 pa 11 aña basa riba e conseho cu nan a haya di Gezondsheid Raad di Hulanda cu a haci varios investigacion riba e posibel efectonan secundario, riba e dosis tambe cu tin cu suministra e muchanan. El a indica cu obviamente e dosis ta uno hopi mas liviano y tur mucha entre 5 cu 11 aña lo ricibi dos dosis solamente, no manera e adultonan cu ta hayando tres dosis cu e booster shot.

Cuminsando diaranson 26 di januari muchanan cu no a logra presenta na e vacunathon infantil por pasa na DVG pa vacuna, pero esaki ta bay via cita solamente.

Grupo Movemento Pro Derecho Humano tambe tabat’ey presente pafo di Compleho Deportivo Betico Croes pa protesta contra e vacunacion di mucha. Desde e inicio di e programa di vacunacion e grupo aki ta vocifera nan opinion contra vacunacion.

Sr. Aldrick Tromp ta splica cu nan ta desconfia di e sistema di DVG y Gobierno “pasobra nan ta haci puro propaganda y parti miedo” pero nan no ta splica tocante suplementonan, tocante vitamina y comemento saludabel cu ta yuda eleva e sistema inmunologico di un manera natural.

“Awe nos ta ‘kinan pa defende nos muchanan pasobra muchanan ta esunnan cu menos mester di vacuna, nan no mester di dje at all. Muchanan nan sistema inmunologico ta 10 biaha miho cu di nos. E porcentahe di sobreviviencia pa covid di muchanan ta 99.998%. Kiermen kico ta e motibo pakico ta vacuna e muchanan?”, el a expresa.