(ElNacional) – Chavismo ta sconde informacion relaciona cu e militarnan deteni pa hechonan di corupcion vincula na e industria petrolero y otro empresanan di e Estado Venezolano, pa cual motibo tin te cu e fecha di awe 58 persona deteni, segun e ultimo actualisacion ofreci pa e fiscal general, Tarek William Saab.
Asina Control Ciudadano a denuncia den un comunicado cu ta bisa cu entre e personanan deteni, tin e oficialnan Antonio Perez Suarez, ex vice presidente di Comercio y Suministro di Calidad di Petroleo di Venezuela; Samuel Testamarck, gerente general di PDV Marina y Jose Agustin Ramos Chirino, ex gerente general di e Direccion di Seguridad Integral di IV Ejes, na e Faja del Orinoco.
E organisacion a señala cu e cifra por ta mas grandi. El a recorda tambe cu Vladimir Padrino Lopez, Minister di Defensa, a pesar cu el a referi na e uniformadonan cu ta envolvi den actonan ilicito, no a indica e identidad di e militarnan ni cuanto ta deteni.
“E titular no a señala un cifra y tin silencio total ariba e detencionnan militar. Den e comunicado, Padrino Lopez, a referi na militarnan cu tabata cumpli cu mision di servicio na PDVSA, pero a sali informacion, no oficial, cu militarnan vincula na e trama di corupcion di e Corporacion Venezolano di Guayana por ta deteni,” e ONG a bisa.
“Tin tiki detaye cla di e investigacion y lista di detenidonan, no tin nada mas cu e confirmacion di algun nomber di e detenidonan y comentarionan general realisa pa Tarek William Saab na e ruedanan di prensa tocante e casonan aki,” el a manifesta.
Control Ciudadano a sugeri e fiscal general di e pais pa comunica a traves di un nota di prensa e cantidad di militarnan deteni, cu informacion completo di nan identidad, rango y componente na cual nan ta pertenece y nan situacion di actividad of reserva activo den cual nan ta. Ademas di e cifra total di civilnan deteni cu informacion completo di identidad, e delitonan cu nan ta wordo acusa di dje, te na cuanto e perdida total di e dañonan na e patrimonio publico ta yega y e luga di detencion di e presunto involucradonan.
