Departamento di Tesoro Mericano a emiti diamars un licencia nobo pa Chevron, e ultimo gran compania petrolero Mericano cu ta sigui opera na Venezuela, dunando e te cu 3 di juni pa likida su empresanan conhunto den e nacion Suramericano.

E licencia tambe ta aplica pa empresanan Halliburton, Schlumberger Limited, GE Baker Hughes y Weatherford International.

E Tesoro a duna un licencia anterior cu tabata autorisa e likidacion di e actividadnan di Venezuela te cu dia 1 di december.

E licencia general aki ta establece cu e transaccion- y actividadnan prohibi pa e orden ehecutivo 13.850 di 2018 necesario pa mantencion limita di operacionnan esencial, contrato y otro acuerdonan na Venezuela lo ta permiti pa e cinco compania aki y nan subsidiarionan te cu juni 2021.

Actividadnan permiti ta esnan necesario pa proteccion of preservacion di activonan di e empresanan aki na Venezuela, y ta inclui concretamente transaccion- y actividadnan necesario pa preserva e seguridad di personal of integridad di operacion- y activonan na e pais; realisa reunion di e mesa directiva y accionistanan; y paga factura na terceronan pa sigura e actividadnan ya menciona. Tambe ta permiti e pago di impuesto local, di servicionan di utilidad na Venezuela y e nomina di empleado- y contratistanan na Venezuela.

Sinembargo un lista largo ta actividad ta keda prohibi. E licencia ta specifica cu no ta autorisa extraccion, procesamento, compra, benta, traslado of envio di petroleo of cualkier producto petrolero Venezolano. Tampoco e companianan por diseƱa, construi, instala, repara of mehora ningun instalacion na Venezuela, of adkiri cualkier bien of servicio excepto esnan rekeri pa e seguridad di esakinan. Tampoco por contrata personal of servicio adicional a menos cu ta rekeri pa seguridad.

Di otro banda, OFAC ta sigui prohibi e pago di cualkier monton na Pdvsa of cualkier entidad den cual e estatal Venezolano ta posee 50% of mas di participacion accionario, incluyendo prestamo y subsidio.

Ademas ta mantene prohibicion riba cualkier transaccion of acuerdo relativo na exportacion of reexportacion di diluyente, directa- of indirectamente na Venezuela.
Finalmente ta aclaria cu e licencia no ta relaha e sancionnan contra personanan blokea pa gobierno Mericano.

 

LEAVE A REPLY

Please enter your comment!
Please enter your name here