(ElNacional) – Venezuela ta ubica na di tres luga den e ranking di paisnan cu inflacion alimenticio mas halto na mundo, segun datonan recientemente publica pa Banco Mundial.

Aunke e pais a supera e hiperinflacion cu el a pasa aden entre 2017 y 2021, e organismo a registra 155% di inflacion anual den bienes relaciona cu e alimentacion di e Venezolano.

E porcentahe aki di inflacion alimenticio obteni entre juli 2021 y juli di 2022 a ubica Venezuela tras di Libanon (332%) y Zimbabwe (309%), mientras cu el a cay ariba paisnan manera Turkía (95%), Iran (91%), Argentina (66%) y Etiopia (38%).

E indicenan di inflacion alimenticio den ultimo añanan a aumenta drasticamente manera resultado di pandemia di COVID-19, como tambe e interupcionnan di e cadenanan di suministro provoca pa e guera entre Rusia y Ucrania.

Cifranan di Banco Mundial ta señala cu e indice di prijsnan agricola ta hasta 20% mas halto na juli 2022 compara cu januari 2021.

E situacion aki a afecta principalmente e paisnan di menos ingreso. Como resultado Banco Mundial ta adverti cu un 345 miyon di persona na 82 pais ta sufri di inseguridad alimenticio, un margen den cual e bida di individuonan por wordo considera incluso un riesgo pa motibo di hamber.

E comision economico pa Latino America y Caribe a indica den un rapport publica den luna di juni cu alrededor di 7.8 miyon di persona ta den riesgo di cay den inseguridad alimenticio na Latino America y Caribe.

LEAVE A REPLY

Please enter your comment!
Please enter your name here