Venezuela ta actualmente e pais unda desnutricion a aumenta mas, y a pasa di 2,9 miyon persona entre 2013 y 2015 te na 6,8 miyon den e periodo 2016-2018.

Hamber a aumenta na America Latino na 2018 y a afecta 42,5 miyon persona, 6,5 % di e poblacion di e region, den cual tambe inseguridad alimentario y obesidad ta continua como un desafio prioritario, asina Organisacion pa Alimentacion y Agricultura di Nacionnan Uni (FAO) a adverti e siman aki.

E 42,5 miyon Latinoamericano cu a sufri hamber na 2018 ta representa un aumento di 4,5 miyon, compara cu e minimo di 38 miyon cu a reporta na 2014, segun FAO.

E aumento ey por atribui casi den su totalidad na e paisnan Suramericano, unda e cantidad di persona subalimenta a crece cu 4,7 miyon den e lapso di cuatro aña.

E cifranan ta forma parti di e informe “Panorama di seguridad alimentario y nutricional na America Latino y Caribe 2019”, elabora hunto cu Organisacion Panamericano di Salud (OPS), Unicef y e Programa Mundial di Alimento (WFP).

E informe, difundi na e sede regional di FAO na Santiago, ta destaca cu Haitita e pais di e region cu mas hende cu hamber, practicamente mita di e poblacion (49,3 %).

E analisis di e cifranan pa pais ta refleha un heterogeneidad grandi den e lucha contra hamber. Entre e paisnan cu a logra reduci hamber ta sobresali Colombia, cu a pasa di 3,6 pa 2,4 miyon persona den e ultimo añanan, y Mexico, Bolivia y Republica Dominicana.

E paisnan cu e porcentahe mas abao di persona desnutri, bao 2,5% di poblacion, ta Brasil, Cuba y Uruguay. Chile ta cerca di e grupo aki, cu un prevalencia di hamber di 2,7 %.

Segun FAO, 24 % di Latinoamerica, como 105 miyon persona, ta padece obesidad, practicamente dos biaha e promedio mundial, cu ta na 13,2 %.

Pa cada persona cu ta sufri hamber na America Latino y Caribe, mas di seis tin sobrepeso of obesidad, un problema cu ta aumentando den tur grupo di poblacion, specialmente entre adulto y mucha den edad escolar.

 

LEAVE A REPLY

Please enter your comment!
Please enter your name here