Segun agencia di noticia Reuters, gobierno interino y regimen di Nicolas Maduro lo a cuminsa dialogo, memey di e pandemia di coronavirus. E acercamento lo ta consecuencia di preocupacion encuanto Covid-19, e hiperinflacion y e creciente falta di combustible, mientras cu miembronan di e regimen ta trata di sigura nan sobrevivencia politico despues di un posible cambio di gobierno, segun e agencia.
E existencia di e reunionnan a keda revela pa Reuters cu a splica cu “no tin negociacion, sí tin acercamento (…) Tin factornan clave den e regimen cu kier negocia pa salba nan mes,” un diputado di gobierno interino a bisa, cu ta al tanto di e contactonan.
No obstante, un parti ilustrativo di e articulo, cu tin firma di e periodistanan Corina Pons y Mayela Armas, ta indica cu “a pesardi no tin un agenda cla”, “e conversacionnan exploratorio ta mustra cu e aliadonan di Maduro y Guaido no ta convenci cu nan por vence e otro memey di e pandemia, e collapse di prijs di petroleo y e sancionnan Mericano.”
“Tin dos extremo. Maduro y esnan cu ta kere cu e virus por yuda caba cu e liderazgo di Guaido y esnan di otro banda cu ta spera cu e crisis aki lo logra tumba Maduro,” un diputado opositor a declara, na fabor di e negociacion. “Mi ta kere cu mester busca solucion”, un fuente consulta pa e medio a añadi. Siete fuente distinto a confirma existencia di e reunionnan.
Reuters no por a determina ki tempo e conversacionnan a cuminsa, unda y con nan ta tuma lugar, ni e postura di Maduro y Guaido respecto esaki y su contenido. No obstante, nan ta bin den cuadro di e accionnan tuma pa e gobierno interino y, paralelamente pa Merca, pa purba caba cu e dictadura.
