Presidente interino di Venezuela, Juan Guaido, a alerta cu e pais ta entre e cinco paisnan cu riesgo di un hambruna, segun datonan di Organisacion di Nacionnan Uni (ONU).

Bao di dictadura di Nicolas Maduro a desaroya un hiperinflacion continuo cu a contribui na un contraccion economico, cu problema serio di suministro di servicio basico, manera awa, luz y combustible. Tambe e cuarentena prolonga te den luna di juni ta ser usa pa gobierno pa persecucion di prensa y a habri paso na mas violacion di derecho humano.

“Nos ta e unico pais na mundo cu sin pasa den un guera ta den riesgo di hambruna,” Guaidoa bisa a traves di su cuenta di Twitter.“Den nos pais tin 9,3 miyon persona cu ta sufri hambre pa culpa di e regimen, pesey e ta urgi pa instala un Gobierno di Emergencia Nacional, pa detene e guera di e dictadura contra e ciudadano,” Guaido a agrega.

Mientras tanto, tension ta aumentando, tambe pa e situacion di combustible cu no ta afecta solamente e ciudadano, sino tambe economia y e propio regimen. Cu cinco tanker di Iran na caminda cu gasolin pa mantene e regimen den operacion, y e posibilidad di gobierno Mericano tumando accion pa para entrega di e alrededor di 175.000 tonelada metrico di gasolin ( 1,2 miyon bari) den puertonan Venezolano, e situacion na e pais por desencadena rapidamente den un conflicto mayor, cu gran parti di e poblacion cu problema di haya cuminda, cu no ta yega e centronan urbano pa falta di transporte. Na varios parti di e pais hende ta desobedece e cuarentena bao di cual nan no por sali di cas, en busca di cuminda cerca parti di e comercio cu ta opera ainda.

 

LEAVE A REPLY

Please enter your comment!
Please enter your name here