Parlamento Venezolano, di mayoria opositor, a ratifica Juan Guaido como Presidente encarga di e pais te cu e “usurpacion di parti di e regimen termina, segun un acuerdo aproba ayera.
E aprobacion a bin un dia despues cu regimen di Maduro y un sector minoritario di oposicion a acorda un dialogo, lagando Guaido un banda, pa trata di resolve e crisis politico y economico grave.
E acuerdo legislativo ta consagra e “respaldo politico irestricto na e liderazgo di Juan Guaido como presidente di Asamblea Nacional y como presidente encarga (…) te cu e usurpacion termina.”
E decision aki lo implica cu e lider opositor, reconoci como mandatario interino pa mas di 50 pais, lo continua como lider di e parlamento despues di 5 di januari proximo, ora su periodo finalisa. Un acuerdo entre e coalicion opositor ta contempla e rotacion di presidencia di Parlamento cada aña.
Durante e proximo periodo presidencial lo a coresponde na e movimentonan minoritario, entre nan algun di e mas radicalnan y cu a firma e pacto cu Maduro, cu ta supone tambe e regreso di e bloke Chavista den Parlamento, di cual nan a retira na 2016, y eleccion di un Conseho Electoral nobo.
E acuerdo cu e minorianan a cera cu Maduro a tuma luga despues cu Guaido a declara e negociacion na Barbados pa termina. Den e dialogo cu Maduro a organisa no ta considera e tema di eleccion presidencial nobo.
Union Europeo, referiendo ayera na e pacto di Maduro cu e sector minoritario di oposicion, a señala cu cualkier negociacion, pa ta creibel, ta demanda respaldo di Asamblea Nacional y e “claro obhetivo di tene eleccion presidencial.”
Reaccionando riba esey, Guaido a declara cu e unico organismo cu tin legitimidad y representacion na e pais, ta e unico reconoci na mundo, esta e Asamblea Nacional.
