Hiperinflacion ta sigui un problema mayor pa tur Venezolano, especialmente esnan cu no ta dispone di dollar en efectivo. E Indice Nacional di Prijs pa Consumidor di Asamblea Nacional a registra na april un inflacion na e pais di 80%. E informacion a keda publica ayera pa Angel Alvarado, miembro di e Comision Parlamentario di Finanzas y Desaroyo Economico.

E parlamentario a indica riba Twitter cu e inflacion interanual tabata 4.210%, mientras cu e inflacion acumula durante promer cuatro luna di aña tabata 341%.

Segun categoria, el a señala cu alimento a mustra un incremento di 53% den prijs, bebida alcoholico 132%, vivienda 112%, salud 162% y transporte 108%.

Alvarado a precisa cu un famia Venezolano mester di 208 dollar pa luna pa yega na e Canasta Basico Alimentario.“E prijsnan a explota na april,” Alvarado a bisa. Te cu 7 di mei, 98,7% di e poblacion Venezolano no tabata conta cu ningun tipo di reserva, di acuerdo cu e cifranan di e Encuesta Nacional Impacto Covid-19, publica pa Centro Nacional di Comunicacion.

Tambe e cifranan ta indica cu e capacidad di resisti di e Venezolano, segun nan entrada, ta di 1,3% durante mas di un luna, mientras cu 8% so tin recurso economico pa cubri nan gasto entre un siman y un luna.

Siman pasa por ehemplo, a paga e promer pensionnan di luna di februari a traves di Instituto Venezolano di Seguro Social (IVSS).E suma tabata 365.665,62 bolivar como pension, alrededor di dos dollar. Sin embargo, pa via di e crisis cu ta golpea e pais, esaki apenas ta yega pa cumpra un carton di webo di 320.000 bolivar. Tambe nan ta hay’e ‘bono de guerra economica’ di 99.404,20 bolivar, loke na e actual nivel di cambio ta un poco mas cu 0,50 dollar.

LEAVE A REPLY

Please enter your comment!
Please enter your name here