(infobae/ElNacional) – Mientras cu ta sigur cu presidente Maduro lo ta e candidato pa partido Socialista Uni di Venezuela (PSUV), e panorama na banda di oposicion ta mustra hopi diferente. E lidernan mas importante no lo por participa den un eventual eleccion, ya cu pa diferente decision di e regimen den nan persecucion di oposicion, nan no por participa.

Esaki ta conta pa  por ehemplo Leopoldo Lopez, lider di Voluntad Popular (VP), cu na juli pasa a pasa pa house arest, despues di tres aña y mey den prizon, condena na mas di 13 aña pa su presunto responsabilidad di morto di hende den confrontacion di demostrantenan cu forsanan policial y militar.

Antonio Ledezma ta otro lider di oposicion cu no por enfrenta e Chavistanan den eleccion. El a wordo deteni na februari di 2015. El a pasa un tempo den prizon, pero despues pa problema di salud a haya permiso pa cumpli house arest na su cas, di unda el a logra huy pa exterior na  2017 y actualmente tin asilo politico na Spaña. Desde aya e ta denuncia regularmente e actonan di e regimen dictatorial.

Henrique Capriles, candidato pa presidente na dos oportunidad (2012 y 2013) y gobernador di Miranda, a haya prohibicion di control general pa ocupa funcion publico, bao acusacion di entre otro iregularidad cu presupuesto y di firma contracto pa gobernacion di estado Miranda sin cumpli cu e normanan. E prohibicion ta pa 15 aña.

Aunke e no tabata figura como un di e personalidadnan fuerte di oposicion, Freddy Guevara a tuma rienda di Voluntad Popular desde cu Leopoldo Lopez a keda preso. Esaki a trece den bista di e Chavistanan cu no ta laga ningun hende lanta como potencial lider di oposicion. Na november aña pasa tribunal supremo di husticia, bao control Chavista tambe, a ordena pa kita su inmunidad como miembro di parlamento (Asamblea Nacional), bao control di oposicion.  Tambe a prohibie biaha pa exterior y finalmente el a busca refugio den embahada di Chile.

Na e momento aki Henry Ramos Allup, lider di Accion Democratica (AD) y ex-presidente di Asamblea Nacional, ta un di e poco figuranan grandi di oposicion cu tin opcion pa propone como candidato pa presidente. Sinembargo, esaki no ta implica cu oposicion a dicidi caba cu ta bay eleccion presidencial bao di e condicionnan actual, sin garantia di un proceso electoral limpi, completamente controla pa e regimen di Nicolas Maduro. Den e dialogo teni na Santo Domingo tabata hustamente e meta pa logra garantia pa eleccion limpi, loke awor ta parce imposibel.

Cu oposicion persigui y completamente limita, e dictadura Chavista ta cuminsa orkesta un mandato nobo pa Maduro. E propio Diosdado Cabello a confirma cu e hefe di estado lo ta e candidato pa partido socialista uni di Venezuela (PSUV):  “Nos no ta bay tin problema, nos tin un solo candidato pa continua cu e revolucion”, el a manifesta den Asamblea Constituyente.