E task force cual ta un cooperacion entre diferente departamento cu ta encarga cu ehecuta e beach policy di gobierno ta informa cu nan ta mirando posibilidad pa inclui otro departamentonan den esaki ainda. Alabes no tin claridad riba con lo atende cu problema di bendemento di droga riba beachnan.
Lider di e task force Beach Policy Gino Winklaar, kende alabes ta district chef na warda di Noord, a conta durante un conferencia di prensa con e cooperacion cu ta contando cu ne den e task force ta algo cu pa hopi tempo lo mester a bin pa ataca diferente problemanan na nos beachnan. Aunke hopi di e companianan di watersport cu nan a controla durante un accion riba diadomingo ultimo a haya nan prome aviso den e modelo di ‘three strikes you’re out’, e companianan a coopera di manera ameno cu autoridadnan.
E task force aki a wordo crea y tabata den plannan pa algun tempo despues cu mandatarionan a nota cu un Beach Policy a wordo efectua pa basta tempo pero cu esaki no a wordo ehecuta. Loke a conduci na e ‘accion relampago’ di a crea e task force cu expedicion tabata e video cu a circula di propietarionan di companianan di watersport cu a tira palabra pa otro, segun sr. Winklaar.
Loke e lider di e task force a subraya ta cu hopi di e companianan cu a haya nan prome aviso a enfrenta tabata cu hopi di nan a asumi cu e permiso cu nan a haya tabata valido pa varios cos. Un ehempel ta cu e personanan cu a haya permiso pa opera riba beach no necesariamente ta haya permiso pa pone stoel di beach y haci negoshi cu esaki.
Ademas di a topa diferente negoshi sin permiso pa opera, bou cual un di nan tabata un restaurant sin permiso pa opera ni un aprobacion di departamentonan di sanacion, a topa cu diferente construccionnan ilegal durante e task force su sondeo. A duna ehempel di algun pier cu lo a wordo construi sin a ta den posesion di un permiso pa construi.
E manera con lo inventarisa y percura cu ta tene cuenta cu e cantidad di strikes cu e companianan haya conforme e maneho aki ta cu por medio di DIP su departamento di Toezicht, Handhaving en Controle. Esaki hefe di e departamento Robert Maduro tambe a confirma.
Interes di otro departamentonan pa drenta e task force
Pa por atende cu mas asunto, por ehempel asunto fiscal pa percura cu negoshinan ta pagando nan impuestonan y otro debernan manera necesario, e task force ta considerando laga otro departamentonan drenta e task force. Asina sr. Winklaar a conta, cu hasta departamento di impuesto tin interes pa forma parti di e task force.
‘Tur ciudadano tin derecho pa para un hende di comete un crimen’
Durante e conferencia sr. Winklaar a duna di conoce cu e agentenan cu tabata disponibel pa haci chekeo riba beachnan tabata 40. Pero e cantidad di agente disponibel actualmente a baha te na 18 pa 19, un cantidad cu ta mita di loke e tabata antes. Aunke e aspecto aki ta crea un reto pa por haci chekeo regular– ademas di e manera con tin menos visibilidad pa via di hotelnan– sr. Winklaar no ta duda den habilidad di e polis cu ta controla riba beach.
Posiblemente pa por tene mas bista riba e acontecimento riba beach, lo ta pensando pa train cierto security priva cu ta traha den areea hotelero pa nan por sirbi como un extra wowo di Cuerpo Policial. Sinembargo un miembro di prensa a cuestiona si esaki lo tin un funcion si nan no tin e autorisacion pa haci aresto. Na esaki sr. Winklaar a declara cu ‘tur ciudadano por para un persona cu ta haciendo un crimen’, pero lo unico cu mester haci ta percura pa yama polis lo mas pronto posibel pa nan tuma responsabilidad di sigui e detencion y aresta e persona.
Cuestion di bendemento di droga riba beach
E cuestion di bendemento di droga riba e beach tambe a wordo toca durante e conferencia di prensa, pero riba esaki sr. Winklaar no tabata kier a duna ningun comentario mirando cu ‘na Cuerpo Policial ta traha a base di echo y e pregunta aki ta basa riba insinuacion cu ta wordo tendi via via’. Sinembargo colega di prensa a subraya cu te hasta algun general managers di hotel a yega di declara nan frustracion cu e manera con ta bende droga riba e beachnan.
Sr. Winklaar a duna di su banda cu si algo ta poni den corant no ta haci esaki un echo. Pero colega di prensa a cuestiona si ta un persona cu sa di kico e ta papia ta declara esaki, esaki no ta confiabel?
Nos no a logra haya un clarificacion riba kico e maneho di bendemento di droga riba beach ta den e task force of con lo ataca esaki en general.
